Valencia 0-3 Abertawe

Wilfried Bony Wilfried Bony gafodd gôl agoriadol yr Elyrch

Valencia 0-3 Abertawe

Pan ddaeth yr enwau o'r het ar gyfer rownd y grwpiau yng Nghynghrair Europa, doedd dim amheuaeth mai Valencia oedd y bygythiad mwyaf yn Grŵp A i Abertawe.

Gan mai'r gêm oddi cartref yn Sbaen oedd y gyntaf i'r Elyrch ar yr amserlen, roedd Michael Laudrup yn awyddus i gael dechreuad da - fe gafodd ddechrau gwell nag yr oedd unrhyw un wedi'i ddisgwyl.

Dechreuodd pethau fynd o'i le i Valencia wedi dim ond naw munud. Llwyddodd Wilfried Bony i ddwyn y bêl gan Adil Rami, ac wrth i Bony redeg tuag at y gôl fe gafodd ei dynnu i lawr gan amddiffynnwr Valencia.

Doedd dim dewis gan y dyfarnwr ond dangos y cerdyn coch i Rami am drosedd broffesiynol.

O fewn pedwar munud i hynny roedd Abertawe ar y blaen. Symudiad hyfryd i lawr yr asgell chwaith a Michu yn croesi i ganfod troed Bony - 1-0.

Adil Rami Gwelodd Adil Rami gerdyn coch wedi dim ond naw munud i Valencia

Roedd hi'n draed moch yn amddiffyn Valencia droeon, ond methodd yr Elyrch â manteisio ar sawl cyfle cyn yr egwyl.

Cic rydd ardderchog

Ond yna wedi 58 munud, daeth yr ail i'r ymwelwyr. Symudiad da arall a phas gywir gan Pozuelo yn canfod Michu cyn iddo yntau osod ei ergyd i gefn y rhwyd.

Pedwar munud wedi hynny fe gafodd Abertawe gic rydd rhyw 30 llath o'r gôl. Aeth ergyd Jonathan De Guzman yn syth i gornel ucha'r rhwyd - gôl oedd ddigon da i ennill unrhyw gêm.

Ar ddechrau'r ornest roedd gan Abertawe chwech o Sbaenwyr yn eu tîm - dim ond pedwar oedd gan Valencia ac roedd cefnogwyr y tîm cartref yn barod iawn i ddangos eu hanfodlonrwydd gyda'r perfformiad.

Byddai'r cefnogwyr o Abertawe a deithiodd i dde-ddwyrain Sbaen wedi bod yn hapus gyda buddugoliaeth. Roedd cael triphwynt mewn modd mor bendant a gyda pherfformiad mor wych yn well na hynny, ac mae'n argoeli'n dda ar gyfer gweddill y gystadleuaeth.

Gwleidyddiaeth

Pigion

  • Maes yr Eisteddfod GenedlaetholBargeinion y brifwyl yn Sir Gâr

    Yr Eisteddfod Genedlaethol yn cynnig tocynnau am £10 ar gyfer y brifwyl eleni i bobl sydd yn eu prynu mewn da bryd.


  • Efa Gruffudd Jones, Prif Weithredwr yr UrddYn 'hapus' gyda'i MBE

    Wrth siarad yn gyhoeddus am y tro cynta' ers derbyn MBE, prif weithredwr yr Urdd yn dweud ei bod yn 'hapus iawn'.


  • Bae Rhosili Mwy o draethau'n cyrraedd y safon

    Mae'r Gymdeithas Gadwraeth Forwrol yn dweud bod 71.7% o draethau Cymru wedi cyrraedd y safon gorau posib o ran cyflwr y dŵr.


  • Dolffiniaid'Y cysylltiad agos'

    Dathlu'r cysylltiad rhwng Ceredigion a dolffiniaid trwynbwl ar ddiwrnod arbennig.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.