Cymru 22 - 30 Iwerddon

Dechrau digalon

Straeon Perthnasol

Os buodd erioed gêm le roedd yr ystrydeb 'gêm o ddau hanner' yn wir , hon oedd hi.

Ar ddiwedd yr hanner cyntaf, roedd yn anodd credu mai Cymru oedd yn amddiffyn Pencampwriaeth y Chwe Gwlad eleni wrth i'r Gwyddelod reoli'r hanner cyntaf.

Daeth y cais cyntaf i Iwerddon wedi dewiniaeth O'Driscoll, gyda phas wych a dwyllodd Alex Cuthbert gan adael i Simon Zebo dirio yn y gornel wedi 11 munud. Llwyddodd Sexton gyda'r trosiad.

Y Gwyddelod gafodd 72% o'r meddiant yn yr ugain munud agoriadol, ac felly pan aeth cic gosb Sexton rhwng y pyst i'w rhoi 10-0 ar y blaen, roedd hynny'n adlewyrchiad teg o'r chwarae.

Daeth eu hail gais wedi 23 munud wedi i gic Dan Biggar gael ei tharo i lawr gan Rory Best gan arwain at gais Cian Healy.

Roedd Biggar - 23 oed, oedd yn cymryd lle Rhys Priestland ac yn ennill ei 12fed cap i Gymru mewn gyrfa a ddechreuodd yn 2008 yn erbyn Canada - ar fai y tro hwn wrth gymryd llawer gormod o amser wrth gicio.

Cymru v.Iwerddon - y chwe gêm ddiwethaf

  • 2012 - Iwerddon 21-23 Cymru
  • 2011 - Iwerddon 10-22 Cymru (Cwpan y Byd)
  • 2011 - Cymru 19-13 Iwerddon
  • 2010 - Iwerddon 27-12 Cymru
  • 2009 - Cymru 15-17 Iwerddon
  • 2008 - Iwerddon 12-16 Cymru

Fe fydd Shaun Edwards yn gandryll bod Cymru wedi ildio dau gais yn y fath fodd.

Llwyddodd Sexton drachefn gyda'r trosiad a chyda chic gosb arall.

Wedi hanner awr Cymru 0 - 20 Iwerddon a mudandod y Cymry yn y dorf o 73, 230 yn dweud y cwbl.

Roedd Cymru yn dyheu am bwyntiau, ac fe ddaethant o'r diwedd wedi 33 munud gyda chic gosb Halfpenny.

Ar ôl i Aaron Shingler gael ei gosbi am beidio â rhyddhau'r dyn â'r bêl ar lawr eiliadau cyn yr egwyl, parhaodd Sexton ei record 100% wrth gicio at y pyst yn yr hanner cyntaf.

Healy yn sgoro cais allweddol Healy yn sgoro cais allweddol
Ar yr egwyl Cymru 3 - 23 Iwerddon.

Beth bynnag a ddywedwyd gan Rob Howley ar yr egwyl, roedd hi'n ymddangos yn dda i ddim wedi 43 munud wrth weld amddiffyn y Cymry ar chwâl gyda'r ddraenen gyson honno yn ystlys y Cymry, O'Driscoll, yn manteisio ar fwlch a grëwyd gan wrth-rycio Coombs i gael cais, a Sexton yn trosi.

O'r diwedd wedi 48 munud daeth rhywbeth i godi calonnau'r Cymry, gyda daliad da Coombs yn creu'r sylfaen i Cuthbert dorri trwy amddiffyn y Gwyddelod i dirio, a Halfpenny yn trosi.

Cafodd Best gerdyn melyn wedi 57 munud a manteisiodd y Cymry o fewn munud gyda Halfpenny yn cael cais yn y gornel, wedi symudiad cyffrous a ddechreuodd gyda llinell 13-dyn.

Ar ôl i Conor Murray weld y cerdyn melyn wedi 70 munud, daeth cyfnod o bwyso mawr gan y Cymry, gyda Faletau fodfeddi yn fyr o sgorio cais, a Warburton, Lloyd Williams, a George North yn hyrddio at y llinell gais, ond amddiffyn y Gwyddelod yn rhyfeddol o gadarn.

Ond fe ildiodd yr 14 dyn i'r pwyso wedi 75 munud gyda'r eilydd Craig Mitchell yn hyrddio drosodd wedi sgarmes a Halfpenny yn trosi.

Ar ddiwedd y gêm y cwestiwn mawr oedd, pam yn y byd gymerodd hi hanner awr i'r Cymry ddihuno?

Y freuddwyd o ddal gafael ar y Gamp Lawn wedi diflannu ar y cymal cyntaf, a'r hirlwm wedi'r colledion yn Awstralia ac yng nghyfres yr hydref yn parhau.

Halfpenny yn sgorio cais dros ei wlad Halfpenny yn sgorio cais dros ei wlad

CYMRU v.IWERDDON: Stadiwm y Mileniwm, Caerdydd; Dydd Sadwrn, Chwefror 2 am 1:30pm:

CYMRU: Leigh Halfpenny (Gleision); Alex Cuthbert (Gleision), Jonathan Davies (Scarlets), Jamie Roberts (Gleision), George North (Scarlets); Dan Biggar (Gweilch), Mike Phillips (Bayonne); Gethin Jenkins (Toulon), Matthew Rees (Scarlets), Adam Jones (Gweilch), Andrew Coombs (Dreigiau), Ian Evans (Gweilch), Aaron Shingler (Scarlets), Sam Warburton (Gleision, capten), Toby Faletau (Dreigiau).

EILYDDION: Ken Owens (Scarlets), Paul James (Caerfaddon), Craig Mitchell (Caerwysg), Olly Kohn (Harlequins), Justin Tipuric (Gweilch), Lloyd Williams (Gleision), James Hook (Perpignan), Scott Williams (Scarlets).

IWERDDON: R Kearney; C Gilroy, B O'Driscoll, G D'Arcy, S Zebo; J Sexton, C Murray; C Healy, R Best, M Ross; M McCarthy, D Ryan; P O'Mahony, S O'Brien, J Heaslip (capten).

EILYDDION: S Cronin, D Kilcoyne, D Fitzpatrick, C Henry, D O'Callaghan, E Reddan, R O'Gara, K Earls.

Mwy Am y Stori Hon

Straeon Perthnasol

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

  • Catrin BeardAdolygiad y wasg a'r blogiau Cymraeg

    Dyfodol yr Eisteddfod Genedlaethol, enwau Americanwyr enwog o dras Gymreig a dysgu Cymraeg i oedolion yw rhai o'r pynciau dan sylw.


  • Coron Blaenau FfestiniogPrynu Coron Blaenau ar eBay

    Mae Coron a Chadair Eisteddfod Genedlaethol o Oes Fictoria yn ôl hefo'i gilydd ym Mlaenau Ffestiniog.


  • Dewi PwsGormod o Saesneg ar Radio Cymru?

    Mae Dewi Pws yn gwrthod cyfrannu at Radio Cymru nes bod polisi caneuon Saesneg yn cael ei newid.


  • banciau bwydArchesgob yn ymgyrchu

    Dr Barry Morgan ac esgobion yn ymuno ag ymgyrch y banciau bwyd wrth i ffigyrau ddangos bod dwywaith gymaint o bobl yn defnyddio banciau bwyd nag yn 2012-13.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.