114 o swyddi yn y fantol

Warws Dewhirst Agorodd warws Dewhirst yng Nghapel Hendre ger Rhydaman yn 1997

Straeon Perthnasol

Mae 114 o swyddi dan fygythiad mewn warws yn Sir Gaerfyrddin sy'n storio dillad i gwmni Marks and Spencer.

Cwmni Dewhirst sy'n berchen ar y warws yng Nghapel Hendre ger Rhydaman ac mae cynnyrch yn cael ei wneud dramor, yn cael eu storio yno cyn cael ei dosbarthu i siopau.

Fe fydd cyfnod ymgynghori o 90 diwrnod yn dechrau gyda'r gweithlu ddydd Gwener ond dywedodd Dewhirst na fyddai swyddi'n mynd tan fis Hydref.

Mewn datganiad dywedodd Marks and Spencer na fyddai'n briodol gwneud sylw ar hyn o bryd.

Start Quote

Rydym yn dechrau'r broses ymgynghori cyn gynted â phosib er mwyn ceisio canfod cwmni arall sydd angen adnodd storio”

End Quote Paul Hollins Cwmni Dewhirst
Chwilio am brynwr

Dywedodd Paul Hollins, cyfarwyddwr gweithredoedd adran dillad merched Dewhirst, fod rhaid newid gan nad oedd Marks and Spencer angen y warws bellach i storio'u cynnyrch.

Ond ychwanegodd bod y cwmni yn chwilio am fusnesau eraill i gymryd lle Marks er mwyn ceisio osgoi diswyddiadau.

"Rydym yn dechrau'r broses ymgynghori cyn gynted â phosib er mwyn ceisio canfod cwmni arall sydd angen adnodd storio," meddai.

Agorodd y warws yn 1997 ond daeth rhybudd yr haf diwethaf fod bygythiad i swyddi.

Ar un cyfnod roedd gan gwmni Dewhirst bum ffatri cynhyrchu dillad yng Nghymru ac yn cyflogi tua 1,000 o bobl.

Angen cymorth

Dywedodd Jonathan Edwards AS a Rhodri Glyn Thomas AC o Blaid Cymru fod angen cymorth ar y busnes i ddod o hyd i brynwr am safle Capel Hendre.

Mewn datganiad ar y cyd dywedodd y ddau: "Mae ein swyddfa wedi siarad gyda chyfarwyddwr Dewhirst ac mae'n awyddus i hybu'r adnodd a chanfod prynwr er mwyn cadw dros 100 o swyddi yno a chadw'r lle yn gweithio.

"Mae'r warws yn ddelfrydol ar gyfer cwmnïau newydd a rhai sy'n datblygu, yn enwedig cwmnïau ar-lein sy'n chwilio am storfa ddillad mewn warws arbenigol.

"Mae Capel Hendre yn lleoliad perffaith i'r busnes, gyda mynediad hawdd i'r brif rwydwaith traffyrdd a thaith agos i'r porthladdoedd er mwyn allforio i Iwerddon.

"Yn y cyfamser, rydym wedi ysgrifennu at Weinidog Busnes Llywodraeth Cymru a'r cyngor sir ac wedi galw arnyn nhw i gynnig cefnogaeth lawn i sicrhau dyfodol yr adnodd, ac i warchod swyddi yn yr ardal."

Mwy Am y Stori Hon

Straeon Perthnasol

Gwleidyddiaeth

Pigion

Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.