Dim cytundeb hyd yn hyn rhwng Eos a'r BBC

Logo Eos Roedd y ddwy ochr yn cyfarfod ym Mangor ddydd Mawrth

Straeon Perthnasol

Does dim cytundeb rhwng y BBC a'r asiantaeth hawliau darlledu Eos ynglŷn â thaliadau i gerddorion, awduron a chyhoeddwyr.

Mae'r ddwy ochr wedi bod yn cyfarfod ym Mangor ddydd Mawrth.

Dywedodd Eos eu bod wedi rhoi cynnig newydd i'r BBC sydd i fod i ymateb erbyn dydd Iau.

Dydi Eos na'r BBC ddim wedi dweud beth yw'r cynnig.

'Blaenoriaeth'

Dywedodd llefarydd ar ran y BBC: "Rydym yn dal i drafod gydag Eos, y corff sy'n cynrychioli cerddorion Cymraeg, am yr hawliau darlledu i gerddoriaeth Gymraeg.

"Ein blaenoriaeth ni yw dod i gytundeb sy'n rhesymol ac yn gynaliadwy.

"Mae disgwyl i'r trafodaethau barhau yn hwyrach yr wythnos hon."

Mae Eos yn cynrychioli tua 300 o gerddorion Cymraeg.

"Rydan ni wastad wedi bod yn obeithiol y byddwn ni'n cael cytundeb buan ac rydan ni ychydig yn agosach nag yr oeddan ni," meddai'r cadeirydd, Gwilym Morus.

"Rydan ni wedi gwneud cynnig sylweddol iawn i'r BBC ac maen nhw wedi mynd i ffwrdd i ystyried a gobeithio y daw 'na ateb cyn hir.

"'Dan ni ddim isio gweld mwy o niwed i Radio Cymru ... os rhywbeth, 'dan ni eisie gwarchod y gwasanaeth ond mae angen dwyn pwysau ar y BBC yn Llundain i gamu'n ôl o'r cytundeb sydd ganddyn nhw gyda PRS.

"Rydan ni wedi dod i lawr cryn dipyn yn ein gofynion mewn ymgais y bydd y BBC yn dod i fyny."

Yn y Cynulliad galwodd Simon Thomas, llefarydd Plaid Cymru ar yr iaith Gymraeg, am gytundeb buan.

Roedd yn angenrheidiol, meddai, fod cerddoriaeth boblogaidd Gymraeg yn cael ei chlywed ar Radio Cymru am ei bod yn "denu pobol ifanc i ddefnyddio'r iaith."

Dywedodd y Prif Weinidog, Carwyn Jones, fod angen "setlo'r anghydfod yn gyflym."

Cwtogi

Cyn diwedd 2012 methodd y ddwy ochr â chytuno ar freindaliadau am ddefnyddio cerddoriaeth Gymraeg ar wasanaeth Radio Cymru.

Dydi Radio Cymru ddim yn cael darlledu dros 30,000 o ganeuon poblogaidd Cymraeg ers Ionawr 1.

O ganlyniad mae wedi cwtogi oriau darlledu, ac mae caneuon Saesneg a cherddoriaeth glasurol ac offerynnol yn cael eu chwarae.

Llwyddodd Eos i ddod i gytundeb serch hynny gyda S4C.

Mae pennaeth rhaglenni a gwasanaethau Cymraeg BBC Cymru, Siân Gwynedd, wedi dweud bod cyrraedd cytundeb "yn flaenoriaeth" i'r gwasanaeth a'u bod eisiau dod i gytundeb buan.

Ailystyried

Cyn y cyfarfod ym Mangor dywedodd Eos eu bod yn gobeithio y byddai'r BBC yn ailystyried eu blaenoriaethau a chynnig mwy o arian am eu cerddoriaeth.

Mae Elan Closs Stephens ar ran ymddiriedolaeth y BBC wedi dweud: "Nid yw o fudd i neb, gan gynnwys cynulleidfa deyrngar Radio Cymru, fod yr anghydfod hwn yn parhau.

"Rwy'n erfyn ar y ddwy ochr i ddod i gytundeb teg a fforddiadwy er mwyn i Radio Cymru allu unwaith eto ddarparu'r gwasanaeth llawn sydd mor annwyl gan ei chynulleidfa."

Mwy Am y Stori Hon

Straeon Perthnasol

Gwleidyddiaeth

Pigion

  • Catrin BeardAdolygiad y wasg a'r blogiau Cymraeg

    Dyfodol yr Eisteddfod Genedlaethol, enwau Americanwyr enwog o dras Gymreig a dysgu Cymraeg i oedolion yw rhai o'r pynciau dan sylw.


  • Coron Blaenau FfestiniogPrynu Coron Blaenau ar eBay

    Mae Coron a Chadair Eisteddfod Genedlaethol o Oes Fictoria yn ôl hefo'i gilydd ym Mlaenau Ffestiniog.


  • Dewi PwsGormod o Saesneg ar Radio Cymru?

    Mae Dewi Pws yn gwrthod cyfrannu at Radio Cymru nes bod polisi caneuon Saesneg yn cael ei newid.


  • banciau bwydArchesgob yn ymgyrchu

    Dr Barry Morgan ac esgobion yn ymuno ag ymgyrch y banciau bwyd wrth i ffigyrau ddangos bod dwywaith gymaint o bobl yn defnyddio banciau bwyd nag yn 2012-13.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.