Pobol y Cwm: BBC yn anghytuno â chwyn Llywodraeth Cymru

Pobol y Cwm Dywedodd BBC Cymru fod y pwnc wedi ei drafod yn gytbwys a nad oedd yn torri canllawniau golygyddol y BBC

Straeon Perthnasol

Mae BBC Cymru wedi datgan eu bod yn gwrthod cwyn gafodd ei gwneud ynglŷn â rhifyn diweddar o'r opera sebon Pobol y Cwm.

Fe wnaeth Llywodraeth Cymru ofyn i S4C beidio ag ail-ddangos pennod o Pobol y Cwm, a gynhyrchir gan BBC Cymru, a gafodd ei darlledu ar nos Fercher Tachwedd 28 pan oedd un cymeriad yn feirniadol o'r polisi ar daclo diciâu mewn gwartheg.

Yn dilyn adolygiad manwl fe ddywedodd y gorfforaeth nos Wener eu bod nhw'n fodlon bod sawl safbwynt gwahanol ar y rhaglen a bod y pwnc wedi ei drafod yn gytbwys ac nad oedd yn torri canllawiau golygyddol y BBC.

Yn gynharach yn yr wythnos dywedodd Prif Weinidog Cymru mai fe awdurdododd gais y llywodraeth i S4C beidio ag ailddarlledu'r bennod ar nos Iau Tachwedd 29.

'Materion sensitif a dadleuol'

Yn y bennod dan sylw dywedodd un o'r cymeriadau, Cadno, nad oedd gan Lywodraeth Cymru yr asgwrn cefn i ddifa moch daear.

Roedd y llywodraeth yn honni nad oedd y rhaglen yn dilyn canllawiau golygyddol.

Ond dywedodd S4C fod y rhaglen yn cynnwys amrywiaeth o safbwyntiau a chafodd y rhaglen ei hailddarlledu.

Dywedodd llefarydd ar ran BBC Cymru: "Rydym yn cadarnhau ein bod wedi ymateb i'r gwyn yn dilyn adolygiad manwl o'r bennod o dan sylw yn ogystal â phenodau eraill sydd wedi bod yn ymdrin â'r un stori dros gyfnod o wythnosau a misoedd.

"Fel drama sebon boblogaidd mae Pobol Y Cwm wastad yn anelu at ymdrin â materion sensitif a dadleuol mewn modd sy'n ddealladwy ac yn gytbwys.

"Yn dilyn ein hadolygiad rydym yn fodlon bod amryw o safbwyntiau gwahanol am ddileu diciâu mewn gwartheg wedi cael eu trafod yn y rhaglen hon a thrwy gydol y gyfres.

"Rydym wedi dod i'r casgliad bod ein hymdriniaeth o'r mater pwysig hwn wedi bod yn gytbwys ac yn ddiduedd a'i fod yn cydymffurfio â chanllawiau golygyddol y BBC.

"Felly nid ydym yn cytuno gyda'r gwyn."

Mwy Am y Stori Hon

Straeon Perthnasol

Gwleidyddiaeth

Pigion

  • Coron Blaenau FfestiniogPrynu Coron Blaenau ar eBay

    Mae Coron a Chadair Eisteddfod Genedlaethol o Oes Fictoria yn ôl hefo'i gilydd ym Mlaenau Ffestiniog.


  • Dewi PwsGormod o Saesneg ar Radio Cymru?

    Mae Dewi Pws yn gwrthod cyfrannu at Radio Cymru nes bod polisi caneuon Saesneg yn cael ei newid.


  • banciau bwydArchesgob yn ymgyrchu

    Dr Barry Morgan ac esgobion yn ymuno ag ymgyrch y banciau bwyd wrth i ffigyrau ddangos bod dwywaith gymaint o bobl yn defnyddio banciau bwyd nag yn 2012-13.


  • Efa Gruffudd Jones, Prif Weithredwr yr UrddYn 'hapus' gyda'i MBE

    Wrth siarad yn gyhoeddus am y tro cynta' ers derbyn MBE, prif weithredwr yr Urdd yn dweud ei bod yn 'hapus iawn'.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.