3 Rhagfyr 2012 Diweddarwyd 07:14

Gwobr newydd i artistiaid ifanc

Bydd y gystadleuaeth flynyddol yn agored i bobl ifanc rhwng 17-25 oed

Cyhoeddodd Cyngor Prydeinig Cymru eu bod yn lansio gwobr newydd i artistiaid ifanc er mwyn dod o hyd i sêr y dyfodol.

Dywed y cyngor y bydd gwobr Artist Ifanc Rhyngwladol Cymru yn meithrin talent newydd "ar draws y sectorau creadigol" trwy gynnig llwyfan cenedlaethol a rhyngwladol i'w gwaith.

Fe fydd mwy o fanylion am y wobr yn cael eu cyhoeddi maes o law, ond eisoes dywedodd y Cyngor y bydd yn agored i artistiaid rhwng 17 a 25 oed.

Mae'r gystadleuaeth yn cwmpasu ystod eang o feysydd gan gynnwys peintio, cerflunio ffotograffiaeth, darlunio a ffilm.

'Dathlu talent'

Dywedodd Simon Dauncey, cyfarwyddwr Cyngor Prydeinig Cymru:

"Mae cydnabod a dathlu talent newydd o Gymru mor bwysig, a dyma pam fod y Cyngor wedi creu Gwobr Artist Ifanc Rhyngwladol Cymru.

"Drwy'r wobr hon, byddwn yn manteisio ar rwydwaith eang o artistiaid ifanc gorau Cymru ac yn agor drysau i'r rhai mwyaf talentog ddatblygu'n broffesiynol ac yn greadigol wrth wneud cysylltiadau rhyngwladol parhaol a fydd yn llywio eu gwaith am flynyddoedd i ddod.

"Bydd rhoi cyfle i'r artistiaid hyn arddangos eu gwaith, nid dim ond yng Nghymru ond yn rhyngwladol, yn werthfawr iawn iddynt ar y cam hwn o'u gyrfa a'u bywyd, ac rwy'n hynod falch y byddwn yn rhan hanfodol o'r broses o wireddu hynny."

Mae'r Cyngor eisoes yn noddi nifer o ddigwyddiadau celfyddydol yng Nghymru, gan gynnwys Gŵyl y Gelli Gandryll, yn flynyddol.