29 Tachwedd 2012 Diweddarwyd 20:14

Yr AC Ceidwadol Nick Ramsay yn hwyr i gadeirio pwyllgor

Methodd Nick Ramsay gyfarfod pwyllgor arall ym mis Gorffennaf

Mae Aelod Cynulliad Ceidwadol wedi methu â chyrraedd mewn pryd i gadeirio pwyllgor am yr ail waith mewn pum mis.

Roedd Nick Ramsay awr yn hwyr i gyfarfod o'r pwyllgor menter a busnes yn y Senedd ddydd Iau.

Fe gamodd ei ddirprwy, AC Plaid Cymru Alun Ffred Jones, y gadair yn ei le.

Nid oedd AC Mynwy wedi hysbysu'r pwyllgor o flaen llaw y byddai'n hwyr.

Dywedodd llefarydd ar ran y Ceidwadwyr: "Mae Nick Ramsay yn cydnabod ei ymddangosiad hwyr i'r pwyllgor menter a busnes ac wedi ymddiheuro i bawb.

"Mae ei record bresenoldeb yn y cynulliad ar y cyfan yn deilwng iawn."

Methodd Mr Ramsay gyfarfod pwyllgor arall ym mis Gorffennaf, Dywedodd llefarydd o'i blaid ar y pryd ei fod wedi mynd yn sâl y noson gynt.

Collodd AC Mynwy, sy'n ennill cyflog o £12,420 fel cadeirydd pwyllgor ar ben ei gyflog sylfaenol o £53,852, yr etholiad i fod yn arweinydd y Ceidwadwyr yn y Cynulliad i Andrew RT Davies yn 2011.