Cyhuddo Mark Bridger o lofruddio April Jones

Bwletin arbennig Newyddion 6pm ddydd Sadwrn

Mae Heddlu Dyfed-Powys wedi cyhuddo Mark Bridger, 46 oed, o lofruddio April Jones.

Mae e hefyd wedi ei gyhuddo o'i chipio yn ogystal â cheisio gwyrdroi cwrs cyfiawnder.

Fe fydd yn ymddangos ger bron ynadon Aberystwyth ddydd Llun.

Cafodd y ferch bum mlwydd oed ei chipio ger ei chartref ar ystad Bryn y Gog ym Machynlleth nos Lun.

Mae timau achub yn dal i chwilio am ei chorff. Drwy gydol y dydd, mae timau arbenigol wedi bod yn defnyddio offer sonar i chwilio'r Afon Dyfi rhwng Borth a Machynlleth.

Dywedodd Iwan Jenkins ar ran Gwasanaeth Erlyn y Goron ei fod wedi adolygu'r dystiolaeth a gasglwyd gan yr heddlu a'i fod yn credu bod digon o dystiolaeth i gyhuddo Mark Bridger.

Chweched diwrnod

Daeth y cyhuddiadau ar chweched diwrnod y chwilio amdani, a dywedodd yr heddlu eu bod yn dal yn benderfynol o ddod o hyd i April.

April Jones Cafodd April Jones ei chipio nos Lun

Dywedodd yr Uwch-Arolygydd Ian John: "Er gwaetha'r datblygiadau yn yr ymchwiliad, mae ein sylw o hyd ar ddod o hyd i April ac fe fydd y chwilio'n parhau".

Dywedodd Prif Gwnstabl Heddlu Dyfed-Powys, Jackie Roberts, bod eu meddyliau yn parhau gyda theulu April.

Rhoddodd deyrnged hefyd i'r timau achub a'r cannoedd o wirfoddolwyr sydd wedi bod yn chwilio amdani.

Mae'r heddlu wedi ceisio creu darlun llawn o symudiadau Mark Bridger a'i gerbyd Land Rover glas rhwng 6:30pm ddydd Llun a 3:30pm ddydd Mawrth.

Cafwyd archwiliad fforensig o'r cerbyd, ac mae plismyn hefyd wedi archwilio ffermdy ym mhentref Ceinws lle bu Bridger yn byw yn fwyaf diweddar.

Cronfa

Yn y cyfamser, cafodd cronfa gyhoeddus ei sefydlu ar gyfer teulu a chyfeillion April er mwyn i bobl ar draws y DU ddangos eu cefnogaeth.

Dywedodd Cyngor Tref Machynlleth eu bod wedi sefydlu'r gronfa ar ôl derbyn galwadau o bell ac agos gan bobl oedd am roi arian i April a'i theulu.

Mae Heddlu Dyfed-Powys yn gofyn i bobl sydd â gwybodaeth allai fod o gymorth i'r ymchwiliad i ffonio llinell ffôn arbennig, sef 0300 2000 333.

Mwy Am y Stori Hon

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

  • Catrin BeardAdolygiad y wasg a'r blogiau Cymraeg

    Dyfodol yr Eisteddfod Genedlaethol, enwau Americanwyr enwog o dras Gymreig a dysgu Cymraeg i oedolion yw rhai o'r pynciau dan sylw.


  • Coron Blaenau FfestiniogPrynu Coron Blaenau ar eBay

    Mae Coron a Chadair Eisteddfod Genedlaethol o Oes Fictoria yn ôl hefo'i gilydd ym Mlaenau Ffestiniog.


  • Dewi PwsGormod o Saesneg ar Radio Cymru?

    Mae Dewi Pws yn gwrthod cyfrannu at Radio Cymru nes bod polisi caneuon Saesneg yn cael ei newid.


  • banciau bwydArchesgob yn ymgyrchu

    Dr Barry Morgan ac esgobion yn ymuno ag ymgyrch y banciau bwyd wrth i ffigyrau ddangos bod dwywaith gymaint o bobl yn defnyddio banciau bwyd nag yn 2012-13.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.