1 Medi 2012 Diweddarwyd 18:17

Aur i Ellie Simmonds

Ellie Simmonds

Mae Ellie Simmonds wedi ennill medal aur yn rownd derfynol y nofio 400m dull rhydd S6.

Llwyddodd y ferch 17 oed i greu record Paralympaidd newydd, sef 5:19.17 munud.

Ellie yw'r pumed person o Gymru i ennill medal yng ngemau Paralympaidd 2012.

Dywedodd ar ôl y ras: "Mi wnes i wneud fy ngorau glas.

"Dwi wedi blino'n lân. Alla'i ddim credu mod i wedi gwneud hynny. Roedd mor anodd".

Dywedodd Prif Weinidog Cymru, Carwyn Jones: "Llongyfarchiadau mawr i Ellie Simmonds ar ei medal aur yn y Gemau Paralympaidd.

"Mae ennill aur mewn dwy gemau yn dipyn o gamp ond mae gwneud hwn erbyn yr oedran o 17 yn anhygoel.

"Da iawn Ellie!"

Fe wnaeth Ellie, a anwyd yn Walsall ond a fagwyd yn Abertawe gan fynychu Ysgol Gyfun Olchfa, ennill dwy fedal aur yn y Gemau Paralympaidd yn China yn 2008 pan oedd hi'n 13 oed.

Efydd

Claire Williams oedd y pedwerydd o Gymru i ennill medal ar ôl ennill medal efydd yn rownd derfynol taflu'r discen (F11/12) ddydd Sadwrn, gyda thafliad o 39.63 metr.

Roedd yr athletwraig 24 oed o Gaerfyrddin, sydd â nam ar ei golwg, wedi gorffen yn bumed yng ngemau Paralympaidd 2008 a 2004.