3 August 2012 Diweddarwyd 07:21

Eglwys ym Mro Morgannwg yn gartref i ddiffibrilydd

Gerard Rothwell o Wasanaeth Ambiwlans Cymru a'r Parchedig Anthony Beer gyda'r diffribilydd Gerard Rothwell o Wasanaeth Ambiwlans Cymru a'r Parchedig Anthony Beer gyda'r diffribilydd

Eglwys ym Mro Morgannwg yw'r un gyntaf yng Nghymru i gael diffibrilydd all achub bywydau pobl sydd yn cael trawiad ar y galon.

Mae'r diffibrilydd ar wal yng nghyntedd Eglwys Sant Iago yn Y Wig ac yn y seremoni lansio ddydd mae Archesgob Cymru, Dr Barry Morgan, yn bendithio'r peiriant.

Bydd y diffibrilydd yn yr eglwys am ei bod yn anodd i ambiwlansys gyrraedd y pentref anghysbell yn gyflym adeg argyfwng.

Bydd trigolion y pentref yn cael eu hyfforddi i ddefnyddio'r peiriant.

'Anrhydedd fawr'

Dywedodd y Parchedig Anthony Beer ei bod yn "anrhydedd fawr" fod cyfarpar allai helpu'r gymuned yn cael ei osod yn yr eglwys.

Mae'r cam yn rhan o brosiect Diffibrilyddion ar gyfer Mynediad i'r Cyhoedd.

Eglwys St Iago yn Y Wig Bydd y diffibrilydd yn cael ei osod ar wal yng nghyntedd Eglwys Sant Iago yn Y Wig

Sefydliad Prydeinig y Galon sy'n ariannu'r cynllun a Gwasanaeth Ambiwlans Cymru sy'n darparu hyfforddiant.

Mewn partneriaeth gyda Llywodraeth Cymru mae'r gwasanaeth ambiwlans wedi hyfforddi dros 4000 o wirfoddolwyr ar gyfer safleoedd y prosiect mewn mannau fel gorsafoedd rheilffordd a chanolfannau hamdden a hyd yn oed yn amgueddfa'r Pwll Mawr ac ar ben yr Wyddfa.

'Derbyn cysur'

"Mae hwn yn gam pwysig ac arloesol ar ran yr Eglwys yng Nghymru ac rwy'n falch iawn i fynychu'r lansiad," meddai Dr Morgan.

"Rwyf wedi bendithio rhai lleoedd ac eitemau anghyffredin dros y blynyddoedd ond dyma'r tro cyntaf imi fendithio diffibrilydd na fydd byth yn gorfod cael ei ddefnyddio, gobeithio.

"Fodd bynnag gall plwyfolion a chymuned Y Wig dderbyn cysur gan y ffaith bod y diffibrilydd ar gael".

Dywedodd Gerard Rothwell, rheolwr y prosiect yng Ngwasanaeth Ambiwlans Cymru: "Y bwriad yw arbed bywydau ac rydym yn falch iawn o allu gweithio gyda'r Eglwys a BHF i wneud i hyn ddigwydd.

"Edrychwn ymlaen at ymestyn y cynllun i sawl eglwys anghysbell a chymunedau eraill ar draws Cymru."

Dywedodd Elaine Tanner, Rheolwr Datblygu Sefydliad y Galon yng Nghymru: "Gall diffibrilyddion wedi eu lleoli'n strategol ledled Cymru arbed bywydau.

"Gellid arbed llawer mwy o fywydau yng Nghymru os oes mwy o ddiffibrilyddion yn y gymuned."

Mwy Am y Stori Hon

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

Help / Cymorth

BBC © 2013 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.