26 July 2012 Diweddarwyd 06:54

Ail streic 24 awr gan weithwyr Remploy

Bu gweithwyr Remploy yn protestio tu allan i San Steffan ar Ebrill 20

Bydd gweithwyr ffatrïoedd Remploy yn cynnal eu hail streic 24 awr ymhob un o'r 54 o safleoedd trwy Brydain ddydd Iau.

Cyhoeddodd Llywodraeth San Steffan yn gynharach eleni y bydd 27 o'r ffatrïoedd yn cau, gan gynnwys pump yng Nghymru.

Fe fydd naw arall - gyda dau yng Nghymru - yn destun ymgynghoriad pellach am eu dyfodol.

Disgwylir i 183 o weithwyr golli eu gwaith.

Dywedodd y llywodraeth y dylai'r ffatrïoedd gau er mwyn buddsoddi arian sy'n cael ei arbed mewn cynlluniau fydd yn helpu pobl anabl gael gwaith.

Dim cynilion

FFATRÏOEDD REMPLOY CYMRU

• Aberdâr - CAU
• Abertyleri - CAU
• Merthyr Tudful - CAU
• Abertawe - CAU
• Wrecsam - CAU
• Pen-y-bont ar Ogwr - Ymgynghoriad pellach
• Croespenmaen - Ymgynghoriad pellach
• Porth - Parhau ar agor
• Castell-nedd - Parhau ar agor

Cafodd ffatrïoedd Remploy eu creu er mwyn darparu gwaith o bobl gydag anableddau, ac fe fydd aelodau o undebau Unite a'r GMB ar streic ddydd Iau.

Cafodd y streic gyntaf ei chynnal ar Orffennaf 19.

Dywedodd Ysgrifennydd Unite Cymru, Andy Richards: "Bu yna gefnogaeth gadarn gan weithwyr a'r cyhoedd i'r streic yr wythnos diwethaf ac mae'n debygol y bydd y gefnogaeth yn parhau ar gyfer yr ail streic.

"Mae ein haelodau wedi eu trin yn ddirmygus gan Llywodraeth y DU ac fe allan nhw ddysgu gwers neu ddau o Lywodraeth Cymru sydd wedi dangos eu cefnogaeth i weithwyr Remploy yng Nghymru."

Yr wythnos diwethaf fe gyhoeddodd Gweinidog Addysg Cymru, Leighton Andrews, gynllun gwerth £2.4 miliwn ar gyfer cyflogwyr yng Nghymru fydd yn cyflogi cyn-weithwyr Remploy am o leiaf bedair blynedd.

Bydd y Grant Cynhaliaeth Cyflogwyr yn cyfrannu at gyflogau a "phob costau rhesymol eraill" sy'n gysylltiedig â chyflogi gweithiwr anabl.