16 July 2012 Diweddarwyd 12:00

Poblogaeth Cymru bellach dros dair miliwn yn ôl y cyfrifiad

Datgelu'r nifer sy'n byw yng Nghymru

Mae poblogaeth Cymru wedi cynyddu o 5% (153,000) dros y 10 mlynedd diwethaf yn ôl y Swyddfa Ystadegau Gwladol.

Y boblogaeth ar ddiwrnod y cyfrifiad, sef Mawrth 27, 2011, oedd 3.06 miliwn. 2.91 miliwn oedd y ffigwr yn 2001.

Dyma oedd y cynnydd mwyaf mewn unrhyw gyfnod o 10 mlynedd ers 1921, a mudo yw'r rheswm am 90% o'r cynnydd.

O fewn Cymru, Caerdydd sydd â'r boblogaeth uchaf a'r cynnydd mwyaf mewn poblogaeth.

Bellach mae 346,000 o bobl yn byw yn y brifddinas, sydd 36,000 yn uwch nag yn 2001.

Yno hefyd roedd y dwysedd poblogaeth uchaf, gyda 2,500 o bobl am bob cilomedr sgwâr.

O'r holl awdurdodau lleol yng Nghymru, Blaenau Gwent oedd yr unig un i weld y boblogaeth yn gostwng, a hynny o 0.3%.

Conwy sydd â'r gyfran uchaf o'i phoblogaeth yn hŷn na 65 oed - 25% - ac yng Nghaerdydd oedd yr isaf.

Ac mae gan Gymru gyfran uwch o bobl dros 65 oed na bron pob ardal yn Lloegr.

Plant bach

Cafodd y ffigyrau eu cyhoeddi fel rhan o'r dadansoddiad cyntaf o ganlyniadau Cyfrifiad 2011.

Mae'r boblogaeth wedi tyfu yng Nghymru ac yn Lloegr, ond mae'r cynnydd yn uwch yn Lloegr.

Un grŵp oedran a welodd gynnydd sylweddol oedd plant o dan 5 oed.

Yng Nghymru roedd 11,000 yn fwy o blant o fewn y grŵp yma nag yn 2001 - cynnydd o 7%.

O fewn Cymru, Wrecsam sydd â'r gyfran uchaf o fewn y grŵp oedran yma - 7% - a Cheredigion yr isaf.

Dywedodd cyfarwyddwr y Cyfrifiad, Glen Watson: "Fe weithiodd y cyfan yn dda. Rydym wedi cwrdd â'n targedau o safbwynt ymateb a safon.

"Fe gawsom gefnogaeth wych gan y cyhoedd a gan grwpiau gwirfoddol, grwpiau cymunedol ac awdurdodau lleol yng Nghymru a Lloegr.

"Hoffwn ddiolch i bawb a fu'n rhan o'r gwaith, gan gynnwys y 35,000 o bobl fu'n gweithio ar gasglu'r wybodaeth ac a gynorthwyodd i wneud y cyfrifiad yn llwyddiant."

Cyfrifiad 2011 - gafodd ei gynnal ddydd Sul, Mawrth 27, 2011 - oedd y tro cyntaf i bobl fedru cofnodi eu bod yn Gymry, hyd yn oed os oedden nhw'n byw mewn rhannau eraill o Brydain.

Yn 2000 fe wnaeth Aelodau'r Cynulliad bleidleisio'n unfrydol dros gynnwys y blwch "Cymry" ar y ffurflen yn 2001 ond roedd hi'n rhy hwyr i'w newid.

Dywedodd y Swyddfa Ystadegau Gwladol mai'r ffaith nad oedd y blwch wedi cael ei gynnwys ar y ffurflen yn 2001 arweiniodd at y nifer mwyaf o gwynion.

POBLOGAETH CYMRU - CYFRIFIAD 2011
Awdurdod lleol	Poblogaeth 2011	Poblogaeth 2001	% o newid
Ffynhonell: Cyfrifiad 2011 - Y Swyddfa Ystadegau Gwladol
Caerdydd	346,100	310,100	+ 11.6
Abertawe	239,000	223,500	+ 6.9
Rhondda Cynon Taf	234,400	231,900	+ 1.1
Sir Gaerfyrddin	183,800	173,700	+ 5.8
Caerffili	178,800	169,500	+ 5.5
Sir y Fflint	152,500	148,600	+ 2.6
Casnewydd	145,700	137,600	+ 5.9
Castell-nedd Port Talbot	139,800	134,400	+ 4.0
Pen-y-bont ar Ogwr	139,200	128,700	+ 8.2
Wrecsam	134,800	128,500	+ 4.9
Powys	133,000	126,400	+ 5.2
Bro Morgannwg	126,300	119,300	+ 5.9
Sir Benfro	122,400	113,100	+ 8.2
Gwynedd	121,900	116,800	+ 4.4
Conwy	115,200	109,700	+ 5.0
Sir Ddinbych	93,700	93,100	+ 0.6
Sir Fynwy	91,300	85,000	+ 7.4
Torfaen	91,100	90,900	+ 0.2
Ceredigion	75,900	75,400	+ 0.7
Blaenau Gwent	69,800	70,000	- 0.3
Ynys Môn	69,700	67,800	+ 2.8
Merthyr Tudful	58,800	56,200	+ 4.6