2 July 2012 Diweddarwyd 09:32

Afghanistan: Tri o filwyr wedi eu lladd

Mae'r Weinyddiaeth Amddiffyn wedi cadarnhau fod tri o filwyr wedi eu lladd yn Afghanistan gan aelod o heddlu Afghanistan.

Roedd dau yn aelod o fataliwn cyntaf y Gwarchodlu Cymreig a'r llall yn aelod o'r Royal Corps of Signals.

Dywedodd llefarydd eu bod wedi eu saethu gan ddyn yn gwisgo lifrai heddlu Afghanistan yn Nhalaith Helmand ddydd Sul.

Mae teuluoedd y tri wedi cael gwybod am y digwyddiad.

Roedd y milwyr yn rhan o luoedd dan arweiniad Nato oedd yn hyfforddi milwyr Afghanistan.

Cafodd y tri eu saethu yn Kamparack Pul lle roeddynt yn mynychu cyfarfod gydag arweinwyr lleol.

Roeddynt yn gadael safle archwilio dan reolaeth yr heddlu pan gawsant eu saethu.

Cafodd y plismon ei anafu a'i arestio'n ddiweddarach.

Yr ymosodiad yw'r diweddara lle mae aelodau o fyddin neu heddlu Afghanistan wedi ymosod ar luoedd y cynghreiriaid.

Ym mis Mai cafodd yr is gorporal Lee Thomas Davies, 27, o Gwarchodlu Cymreig a'r Corporal Brent John McCarthy, 25 oed, eu saethu gan aelodau o heddlu Afghanistan yn Lashkar Gar.

Roeddynt wedi bod yn mynychu cyfarfod diogelwch gyda swyddogion lleol pan gawsant eu saethau gan ddau ddyn yn gwisgo lifrau heddlu Afghanistan.