Cyngor: Camgyfri’ pleidleisiau yng ngogledd Prestatyn

Blwch pleidleisio Mae wedi dod i'r amlwg fod rhai o'r pleidleisiau wedi eu camgyfri.

Mae Cyngor Sir Ddinbych wedi ymddiheuro ar ôl i nifer o bleidleisiau ymgeisydd Llafur yn yr etholiad lleol gael eu cofnodi ar gyfer ymgeisydd Ceidwadol â chyfenw tebyg.

Cafodd y Ceidwadwr Allan Pennington 580 o bleidleisiau yn un o dair sedd Gogledd Prestatyn ac etholwyd e'n gynghorydd sir.

Nodwyd fod yr ymgeisydd Llafur Paul Penlington yn aflwyddiannus a'i fod wedi derbyn 366 o bleidleisiau.

Ond mae wedi dod i'r amlwg fod rhai o'r pleidleisiau wedi eu cam-gyfri.

Dywedodd llefarydd ar ran y Cyngor, pe bai'r pleidleisiau wedi eu dosbarthu yn gywir byddai Mr Penlington wedi ennill y sedd i'r Blaid Lafur.

Byddai wedi derbyn 605 o bleidleisiau o'i gymharu â 340 i Mr Pennington.

Mae gan Lafur tan ddydd Iau nesa' i benderfynu a ddylid herio'r canlyniad gerbron barnwr.

Ymddiheuro

Llafur enillodd y ddwy sedd arall yng Ngogledd Prestatyn.

Mae Swyddog Etholiad Sir Ddinbych, Mohammed Mehmet, wedi dweud: "Ar ran y cyngor rwy wedi ymddiheuro i'r ddau asiant.

"Rydym wedi ymchwilio i'r digwyddiad pan ddaeth i'n sylw.

"Byddwn yn ailedrych ar ein trefniadau er mwyn asesu a oes modd eu tynhau ymhellach."

Cafodd Mr Pennington ei ethol yn gynghorydd sir y tro cyntaf yn 2008.

"Mae'n ddrwg gennyf ond alla i ddim gwneud sylw," meddai Mr Pennington.

"Nid fy mai i yw hyn.

"Bydd rhaid i chi siarad â'r cyngor sir."

Gwnaed cais i'r Blaid Lafur am sylw.

Mwy Am y Stori Hon

ETHOLIAD 2012

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.