Buddsoddiad £800m gan Tata yng Nghymru

Cwmni Dur Tata Mae'r buddsoddiad yng Nghymru wedi cael croeso

Straeon Perthnasol

Mae cwmni dur Tata wedi cyhoeddi buddsoddiad o £800 miliwn yng Nghymru dros y pum mlynedd nesa'.

Mae'r cyhoeddiad wedi cael croeso gan Brif Weinidog Cymru Carwyn Jones.

Yr wythnos diwethaf bu Mr Jones yn cyfarfod is-gadeirydd y cwmni dur yn India yn ystod ei ymweliad â'r wlad.

Mae tua 8,000 yn gweithio i Tata yng Nghymru gyda gwaith mewn nifer o safleoedd yma gan gynnwys Llanwern, Port Talbot a Shotton.

Dywedodd datganiad Tata y bydd yr "arian newydd yn fynegiant o'u bwriad a'u gweledigaeth ar gyfer Port Talbot a'r diwydiant dur yng Nghymru".

Yn ôl Mr Jones mae'r cyhoeddiad yn arwydd o hyder y cwmni yng Nghymru.

Swyddi newydd

Eglurodd fod y cyfarfod gyda B Muthuraman yn Mumbai yr wythnos diwethaf yn gyfle iddyn nhw drafod y ffordd ymlaen i'r cwmni yng Nghymru.

Start Quote

Mae Tata wedi dod i mewn ac wedi buddsoddi bob blwyddyn ers iddyn nhw fod yn berchen ar y gwaith”

End Quote Robert Edwards Undeb Community

"Roedd hefyd yn gyfle i drafod parhad partneriaeth Llywodraeth Cymru gyda'r cwmni," meddai.

"Dwi'n gobeithio y bydd y buddsoddiad yma, nid yn unig yn diogelu swyddi ond y bydd swyddi newydd yn cael eu creu yn y dyfodol.

"Dwi'n gobeithio hefyd y bydd cyhoeddiadau eraill yn deillio o'r cyfarfod yn India yr wythnos diwethaf.

"Roedd 'na gryn ddiddordeb yng Nghymru."

Mae Tata eisoes wedi cyhoeddi buddsoddiadau o £240 miliwn ar gyfer gwaith dur Port Talbot gyda £185 miliwn tuag at ffwrnais newydd a £53 miliwn i ddiweddaru'r adran gynhyrchu.

Dywedodd llefarydd ar ran cwmni dur Tata nad yw'r buddsoddiad yma wedi ei gyhoeddi o'r blaen.

Eglurodd Mr Jones fod Mr Muthurman wedi talu teyrnged i safon y gweithwyr sydd ar gael yng Nghymru.

"Dywedodd mai Port Talbot yw un o'r safleoedd cynhyrchu dur gorau yn Ewrop," meddai Mr Jones.

Pwll glo

"Mae'n hwb sylweddol i Gymru," ychwanegodd.

Dywedodd Robert Edwards o undeb Community, sy'n cynrychioli rhai o weithwyr Tata yng Nghymru, fod rhaid rhoi'r cyhoeddiad yng nghyd-destun yr hyn sydd wedi digwydd dros y degawd diwethaf.

"Rydym wedi gweld gwaith trwm yn cau yn Llanwern ac mae gweithfeydd wedi cau.

"Mae Tata wedi dod i mewn ac wedi buddsoddi bob blwyddyn ers iddyn nhw fod yn berchen ar y gwaith.

"Mae'n newyddion gwych.

"Mae 'na son am greu pwll glo newydd ym Mhort Talbot yn y dyfodol.

"Mae 'na wythïen yn yr ardal ac fe fyddai hyn yn fuddsoddiad sylweddol."

Dywedodd Tata y gallai'r buddsoddiad pwll glo greu hyd at 500 o swyddi wrth i'r glo gael ei gloddio a'i ddefnyddio i greu dur.

Mwy Am y Stori Hon

Straeon Perthnasol

Dyw'r BBC ddim yn gyfrifol am safleoedd rhyngrwyd allanol.

Gwleidyddiaeth

Pigion

  • Coron Blaenau FfestiniogPrynu Coron Blaenau ar eBay

    Mae Coron a Chadair Eisteddfod Genedlaethol o Oes Fictoria yn ôl hefo'i gilydd ym Mlaenau Ffestiniog.


  • Dewi PwsGormod o Saesneg ar Radio Cymru?

    Mae Dewi Pws yn gwrthod cyfrannu at Radio Cymru nes bod polisi caneuon Saesneg yn cael ei newid.


  • banciau bwydArchesgob yn ymgyrchu

    Dr Barry Morgan ac esgobion yn ymuno ag ymgyrch y banciau bwyd wrth i ffigyrau ddangos bod dwywaith gymaint o bobl yn defnyddio banciau bwyd nag yn 2012-13.


  • Efa Gruffudd Jones, Prif Weithredwr yr UrddYn 'hapus' gyda'i MBE

    Wrth siarad yn gyhoeddus am y tro cynta' ers derbyn MBE, prif weithredwr yr Urdd yn dweud ei bod yn 'hapus iawn'.


Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.