5 Ebrill 2012 Diweddarwyd 13:16

Ward cyngor heb ymgeiswyr

Mae Arwel Pierce yn rhoi'r gorau i fod yn gynghorydd

Mae cyngor yn dweud bod un o'i wardiau heb ddenu unrhyw ymgeiswyr ar gyfer yr etholiadau lleol.

Daw hyn yn dilyn penderfyniad y cynghorydd annibynnol Arwel Pierce i beidio ag amddiffyn ei sedd yn ward Bryncrug/Llanfihangel yn ardal Meirionnydd, Gwynedd.

Cadarnhaodd y cyngor na dderbyniwyd unrhyw enwebiadau ar gyfer y ward ac y bydd isetholiad yn cael ei gynnal yn y man.

Mr Pierce oedd arweinydd y portffolio priffyrdd ar Gyngor Gwynedd.

Dywedodd llefarydd ar ran cyngor Gwynedd: "Daeth y cyfnod enwebu ar gyfer yr etholiadau lleol i ben am hanner dydd, 4 Ebrill.

"Gallwn gadarnhau na dderbyniwyd unrhyw enwebiadau ar gyfer ward Bryncrug / Llanfihangel.

"Yn unol â Deddf Cynrychiolaeth y Bobl 1983, bydd isetholiad yn cael ei gynnal yn y man i lenwi'r sedd wag."

Mae'r ward yn cynnwys ardal wledig yn ne-orllewin Eryri, gan gynnwys pentrefi Bryncrug, ger Tywyn, a Llanfihangel-y-Pennant wrth droed Cadair Idris.