24 Mawrth 2012 Diweddarwyd 11:54

Plaid Cymru yn gobeithio 'dal ei thir'

Alun Ffred Jones fydd yn goruchwylio ymdrechion etholiadol y blaid ym mis Mai

Mae cadeirydd Plaid Cymru wedi dweud na ellir ystyried canlyniad etholiadau lleol mis Mai fel refferendwm ar arweinyddiaeth Leanne Wood.

Dywedodd Helen Mary Jones fod y blaid yn gobeithio "dal ei thir" ac yn disgwyl wynebu ymgyrch effeithiol gan y blaid Lafur.

Clywodd cynhadledd wanwyn Plaid Cymru hefyd fod y blaid eisoes wedi profi ei gallu i redeg awdurdodau lleol yn effeithiol.

Mae ychydig dros 200 o gynghorwyr gan Blaid Cymru allan o gyfanswm o dros 1,200 ar draws Cymru, ac mae'n arwain dau gyngor sir - Caerffili a Gwynedd.

'Cyfeiriad newydd'

Tanlinellodd Helen Mary Jones mewn cynhadledd i'r wasg taw dim ond chwe wythnos oedd gan y blaid i baratoi am yr etholiadau ers dewis Ms Wood fel arweinydd.

"Beth bynnag yw'r canlyniad, dwi ddim yn meddwl gallwn ni ystyried hwn fel rhyw fath o refferendwm ar sut mae pobl yn ymateb i'n harweinyddiaeth newydd a'n cyfeiriad newydd," meddai.

Mynnodd fod y blaid yn brwydro'n galed i ennill bob pleidlais posib, ond gwrthododd ddarogan os byddai'r blaid yn adennill tir yn ardal enedigol Ms Wood - sef Rhondda Cynon Taf.

Cyn arweinydd cyngor Gwynedd, Alun Ffred Jones fydd yn goruchwylio ymdrechion etholiadol y blaid ym mis Mai.

Mae disgwyl iddo ddweud wrth y gynhadledd yng nghwrs rasio ceffylau Ffos Las, bod Plaid Cymru wedi profi ei gallu i reoli'n effeithiol mewn llywodraeth leol, ond bod yr amser allweddol wedi dod unwaith eto er mwyn mynd ar hyd a lled Cymru er mwyn perswadio etholwyr i'w cefnogi yn y blychau pleidleisio.