9 Chwefror 2012 Diweddarwyd 11:35

Simon Weston eisiau swydd comisiynydd yr heddlu

Fe fydd Simon Weston yn sefyll fel ymgeisydd annibynnol.

Mae Simon Weston, y cyn-filwr fu'n brwydro yn Rhyfel Y Falkland, wedi dweud ei fod eisiau ymgeisio yn yr etholiad i fod yn Gomisiynydd cyntaf Heddlu a Throsedd De Cymru.

Fe fydd yn sefyll fel ymgeisydd annibynnol.

"Ni ddylai fod yn swydd wleidyddol," meddai'r cyn filwr 50 oed, a gafodd ei greithio'n ddrwg yn ystod ymosodiad Yr Ariannin ar long y Syr Galahad yn Rhyfel Y Falkland.

"Os gewch chi ddau wleidydd yn ymgeisio, fe fydd pobl yn pleidleisio dros eu plaid.

"Mae angen rhywun fydd yn sicrhau y bydd pobl yn cydweithio a pheidio â chreu rhaniadau."

Ar Dachwedd 15, 2012 fe fydd 'na etholiad i ddewis Comisiynwyr Heddlu a Throsedd mewn 41 o heddluoedd ar draws Cymru a Lloegr y tu allan i Lundain.

Ymhlith y dyletswyddau y mae sefydlu blaenoriaethau ar gyfer y llu, goruchwylio'r gyllideb a phenodi'r prif gwnstabl.

Llywodraeth y Glymblaid yn San Steffan sydd wedi cyflwyno'r newid ac mae disgwyl i ymgeiswyr sefyll ar ran plaid neu'n annibynnol.

Fe fydd cyflog y comisiynydd yn Heddlu De Cymru yn £85,000 y flwyddyn.

Mae'r cyn-weinidog plismona Alun Michael hefyd wedi dweud ei fod eisiau ymgeisio yn yr etholiad i fod yn Gomisiynydd cyntaf Heddlu a Throsedd De Cymru.