David Cameron yn rhoi cyfarchion i'r Urdd yn 90 oed

Aelodau'r Urdd y tu allan i'r Tŷ Gwyndr yn Whitehall Aelodau'r Urdd y tu allan i'r Tŷ Gwyndr yn Whitehall

Straeon Perthnasol

Mae'r Prif Weinidog, David Cameron, wedi anfon cyfarchion pen-blwydd at yr Urdd sy'n 90 oed yr wythnos hon.

Dydd Llun bu aelodau'r mudiad yn cwrdd ag Ysgrifennydd Cymru, Cheryl Gillan, yn Nhŷ Gwydr, Whitehall a chael tynnu eu llun tu allan i Rif 10 Stryd Downing.

Y pum aelod aeth i Lundain gyda Phrif Weithredwr yr Urdd, Efa Gruffudd Jones, oedd aelodau o Fforwm Ieuenctid yr Urdd Ceredigion a Myrddin, Rhiannon Hincks, Ysgol Penweddig; Sian Elin Williams, Ysgol Llambed; Sioned Evans, Ysgol Bro Myrddin ac Efa Dafydd a Martha Grug Rhys, Ysgol Maes yr Yrfa.

"Mae'r Urdd wedi dihuno dychymyg cenedlaethau o bobl ifanc Cymru ers ei sefydlu," meddai Mr Cameron.

"Mae rhwydweithiau'r Urdd wedi rhoi cyfle i blant o bob cefndir ymuno gyda'i gilydd i ddathlu hanes a threftadaeth Cymru drwy gyfuniad o gerddoriaeth, dawns a drama, yn ogystal â gwyddoniaeth a thechnoleg.

Gwaith caled

"Ers y dyddiau cynnar mae'r mudiad wedi bod wrth galon meithrin balchder yn niwylliant Cymru a'r iaith Gymraeg.

Start Quote

Rydym wedi cael profiadau gwych gyda'r Urdd”

End Quote Rhiannon Hincks

"Mae'r tri gwersyll yng Nglan-llyn, Llangrannog a Chaerdydd yn rhoi cyfle i blant a phobl ifanc wneud ffrindiau am oes a throchi'u hunain yn yr iaith."

Dywedodd yr hoffai ddiolch i bawb oedd yn ymwneud â'r Urdd am eu holl waith caled - a dymuno'r gorau i'r Urdd ar gyfer y dyfodol.

Ychwanegodd Cheryl Gillan ei bod yn edrych ymlaen at gyfarfod ag aelodau a staff a blasu gwaith yr Urdd yn ddiweddarach eleni.

"Yn ystod yr haf byddaf yn mynd i weld sioe Theatr Ieuenctid yr Urdd, Sneb yn Becso Dam, fydd yn cynnwys criw o berfformwyr talentog, fel rhan o Olympiad Diwylliannol 2012.

'Ystod eang'

"O ganlyniad i'r Urdd mae cenedlaethau o bobl ifanc wedi cael cyfle i gymryd rhan mewn ystod eang o weithgareddau artistig a chreadigol trwy gyfrwng y Gymraeg.

"Mae Bryn Terfel, Matthew Rhys, Cerys Matthews, Aaron Ramsey a Shane Williams yn gyn-aelodau ac wedi talu teyrnged i'r mudiad gyfrannodd at eu gyrfa lwyddiannus.

Cyn cychwyn ar y daith dywedodd Rhiannon Hincks ei bod yn edrych ymlaen at gyfarfod Ysgrifennydd Cymru a gweld drws du enwog rhif 10 Stryd Downing.

"Rydyn ni'n cael cyfle yn y prynhawn hefyd i gyfarfod â'r Arglwydd Wigley a Jonathan Edwards, AS Gorllewin Caerfyrddin a Dinefwr.

"Rydym wedi cael profiadau gwych gyda'r Urdd, gan gynnwys prosiect sydd newydd ddod i ben o'r enw Trafodiaith.

"Yn ystod y tri mis yn gwneud y prosiect buon ni'n trafod y problemau sy'n wynebu siaradwyr Cymraeg heddi a cheisio dod o hyd i atebion iddyn nhw drwy gyfrwng theatr fforwm.

"Roedd hwn yn gyfle gwych arall."

Mwy Am y Stori Hon

Straeon Perthnasol

Gwleidyddiaeth

Pigion

Help / Cymorth

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.