नेता केपी ओलीले आफ्नो निवासमा नेताहरूबीच रात्रीभोज र वैठकको अवसर जुटाएका थिए

पुराना कुरा थन्क्याएर नयाँ बाटो तय गर्नेमा सत्ताधारी दलहरु नेपाली कांग्रेस र एमाले तथा प्रमुख प्रतिपक्षी एकिकृत नेकपा माओवादीबीच सहमति भएको थियो।

तर नयाँ बाटोको रेखा कोरिइनसकेको तीनै दलका नेताहरुले बताएका छन्।

सहमति खोज्ने भन्दै पुरानै अड्डीबाट पछाडि नहटिरहेका प्रमुख दलका शीर्ष नेताहरुबीच मंगलबार भेटवार्ता भएको थियो।

त्रुटी लेखाजोखा

माओवादीका कट्टर आलोचक भनेर चिनिएका एमालेका बरिष्ठ नेता केपी ओलीले आफ्नै निवासमा विभिन्न दलका शीर्ष नेताहरूलाई मंगलवार आमन्त्रित गरेका थिए।

मंगलवारको बैठकमा प्रधानमन्त्री माधवकुमार नेपाल, माओवादी अध्यक्ष प्रचण्ड र कांग्रेस नेता शेरबहादुर देउवा लगायत ती पार्टीका अरु बरिष्ठ नेताहरु पनि संलग्न थिए।

रात्रीभोज सहितको भेटवार्ताको भोलिपल्ट झापा पुगेका माओवादी अध्यक्ष पुष्पकमल दाहाल प्रचण्डले सञ्चारकर्मीहरुलाई भने, “बाह्र बुँदेदेखि अहिलेसम्मका सहमतिमा कहाँ कसको त्रुटी भयो लेखाजोखा गर्ने र नयाँ तरिकाबाट अगाडि जानेमा सहमति भयो।”

तर सहमतिको ठोस खाका तयार भइनसकेको उनले बताए।

प्रधानमन्त्रीका राजनीतिक सल्लाहकार रघुजी पन्तले सहमतिको नयाँ वातावरण बनेको जनाए।

तर सहमतिको ठोस खाका नबनिसकेको उनको पनि भनाइ थियो।

उनले भने- “माओवादीका नेताहरु लचिलो भएकाले कुराकानी जारी रहला र सहमतिको खाका तय होला।”

घण्टौं चलेको छलफलको भोलिपल्ट सहभागी नेताहरुले गतिरोध अन्त्य गर्न सकारात्मक वातावरण बनेको बताए तर उनीहरुकै भनाइले पनि साँच्चिकै सहमति बन्ने कुरामा अझ ढुक्क हुन सक्ने स्थिति नरहेको विश्लेषकहरु बताउँछन्।