‘शंका लागे राष्ट्रपति कार्यालयमाथि छानबीन गरे हुन्छ’

पछिल्लोपल्ट अपडेट गरिएको: 05.11.12, 20:35 NST सम्मका समाचार
राष्ट्रपति कार्यालय

आरोपका सम्बन्धमा राष्ट्रपति प्रतिरक्षात्मक हुन नखोजेको उनका सल्लाहकारले बताएका छन्

एकीकृत माओवादीका केही मन्त्रीहरुले राष्ट्रपति रामवरण यादवले सत्ता आफै लिने विफल प्रयास गरेको आरोप लगाई रहेका बेला राष्ट्रपतिका प्रेस सल्लाहकारले त्यसवारे छानबीन गर्न सरकारलाई चुनौती दिएका छन्।

राष्ट्रपति कार्यालयको सुरक्षा र प्रशासनिक काम सरकारको मातहतमा सञ्चालन हुने भएकाले राष्ट्रपतिका क्रियाकलापवारे सरकारले छानबीन गर्न सक्ने राष्ट्रपतिका सल्लाहकारको भनाइ छ।

साथै राष्ट्रपतिमाथि निराधार आरोप लगाउनेमाथि प्रधानमन्त्रीले कारवाही गर्नुपर्ने पनि उनले बताए।

"यदि राष्ट्रपति कार्यालयमा केही भइरहेको छ भन्ने लाग्छ भने त्यसको छानबीन गर्ने र त्यसको जानकारी सर्वसाधारलाई गराउने जिम्मा सरकारको हो"

राजेन्द्र दाहाल, राष्ट्रपतिका प्रेस सल्लाहकार

एकीकृत माओवादीका नेता एवं अर्थमन्त्री वर्षमान पुनले राष्ट्रपति रामवरण यादवले सरकार बर्खास्त गर्न खोजेको तर त्यो प्रयास विफल भएको विवादास्पद टिप्पणी गरेपछि मानिसहरुको ध्यान सरकार र राष्ट्रपतिबीचको सम्बन्धमा केन्द्रित भएको छ।

छानबीन

राष्ट्रपतिका प्रेस सल्लाहकार राजेन्द्र दाहालले बीबीसीसँग कुरा गर्दै राष्ट्रपति निवासमा त्यस्ता गतिविधि भईरहेका हुन भने त्यसको छानबीन गर्ने र ति निराधार भए कारवाही गर्ने दायित्व प्रधानमन्त्रीको भएको बताए।

दाहालले भने, “यदि राष्ट्रपति कार्यालयमा केही भइरहेको छ भन्ने लाग्छ भने त्यसको छानबीन गर्ने र त्यसको जानकारि सर्वसाधारणलाई गराउने जिम्मा सरकारको हो।”

आन्तरिक सुरक्षा संयन्त्र र अन्तर्राष्ट्रिय क्षेत्रसँगको साँठगाँठका आधारमा राष्ट्रपतिले कुनै कदम चाल्न लागेको भन्ने एकीकृत माओवादी मन्त्रीको भनाइ गलत भएको सल्लाहकार दाहालले बताए।

माओवादी मन्त्रीले आफू विरुद्ध त्यस्तो अभिव्यक्ति सार्वजनिक गरेकै दिन आइतबार राष्ट्रपतिले उक्त पार्टीका अध्यक्ष प्रचण्ड र सोमबार एमाले अध्यक्ष झलनाथ खनालसँग भेट गरेका थिए।

राष्ट्रपतिका सल्लाहकारले यी भेटहरु पहिले नै तय भएको बताए पनि कतिपयले चाहिं राष्ट्रपति प्रतिरक्षात्मक हुन खोजेको भनेर टिप्पणी गरेका छन्।

उनका प्रेस सल्लाहकार दाहालले राष्ट्रपति प्रतिरक्षात्मक हुन खोजेको भन्ने आरोपलाई अस्वीकार गरिदिए।

त्यसबारे दाहालले भने, “स्पष्टिकरण दिने वा प्रतिरक्षात्मक हुनुपर्ने अवस्था छैन।”

चिन्तित

राष्ट्रपतिका सल्लाहकारले अस्वीकार गरेपनि एकीकृत माओवादीका मन्त्रीको लाञ्छनाबाट राष्ट्रपति चिन्तित बनेको संकेतहरु बाहिर आएका छन्।

त्यसलाई पुष्टि गर्दै एमाले अध्यक्ष एवं पूर्व प्रधानमन्त्री झलनाथ खनालले बीबीसीसँग भने, “माओवादीका मन्त्रीहरुले जुन आक्रामक हिसाबले राष्ट्रपतिमाथि आरोप लगाउनु भयो त्यो शोभनीय होईन, यो रवैया ठीक लागेन भनेर मैले राष्ट्रपति समक्ष राखें र राष्ट्रपतिले पनि चिन्ता व्यक्त गर्नु भो।”

केही दिन यता बढेको राष्ट्रपति र कार्यकारीबीचको विवादले जारी राजनीतिक गतिरोध फुकाउने र बजेट लगायतका समस्या समाधान गर्ने सवालमा थप जटिलता निम्त्याएको धेरैको विश्लेषण छ।

BBC © 2014 बाहिरी वेबसाइटको सामग्रीका लागि बीबीसी जिम्मेवार छैन।

यो पृष्ठ स्टाइल शीटहरू (CSS) सकृय तुल्याइएको अप टु डेट ब्राउजरमा राम्ररी हेर्न सकिन्छ। यो पेजको सामग्री तपाईं अहिलेको ब्राउजरमा हेर्न त सक्नुहुन्छ तर सम्पूर्ण सेवाहरूको उपयोग भने गर्न सक्नुहुन्न। कृपया आफ्नो ब्राउजर अपग्रेड गर्नुहोस् अथवा सकिन्छ भने स्टाइल शीटहरू (CSS) लाई सकृय तुल्याउनुहोस्।