Manifesto UKIP ga fhoillseachadh

  • 25 An Cèitean 2017
Paul Nuttall Image copyright PA

Foillsichidh ceannard UKIP, Paul Nuttall, manifesto taghaidh a' phàrtaidh aige Diardaoin agus iad a' tilleadh gu iomairt an taghaidh choitchinn.

'S ann Dihaoine a bhios na pàrtaidhean eile a' tilleadh gu na h-iomairtean nàiseanta aca san taghadh, ach bidh cuid dhiubh ag obair aig ìre ionadail Diardaoin.

Thèid am fois poileataigeach a th' air a bhith air iomairt an taghaidh bho bha spreadhadh Mhanchester ann na bu thràithe air an t-seachdain seo a thoirt gu crìch Diardaoin, le UKIP a' foillseachadh a' mhanifesto aca.

Tha ceannard UKIP, Paul Nuttall, a' cumail a-mach gum biodh dàil a bharrachd air a bhith a' tilleadh gu obair àbhaisteach a' ciallachadh gu bheil obair-cheannairc air buannachadh.

Tha e a' gealltainn manifesto radaigich agus thuirt e nach bi leisg air a' phàrtaidh aige trioblaidean nar coimhearsnachdan aithneachadh ann an dòigh nach eil na pàrtaidhean eile a' dèanamh.

Le UKIP a' dol air ais anns na cunntasan-bheachd agus a' call gu dona anns na taghaidhean ionadail bho chionn ghoirid, tha Mgr Nuttall ag ràdh gum bi teachdaireachd radaigeach agus eadar-dhealaichte aig UKIP dhan luchd-bhòtaidh.

Thathar an dùil gun tèid manifestothan an SNP, nan Lib-Deamach ann an Alba agus Pàrtaidh Uaine na h-Alba fhoillseachadh tràth air an-ath-sheachdain, às dèidh na thachair ann am Manchester dàil a chur orra a bhith gam foillseachadh.