"Tha cothrom ann fhathast" - Foran

  • 30 An Giblean 2017
Liam Boyce Image copyright SNS
Image caption Rinn Liam Boyce sgrios air Caley Thistle ann an Inbhir Pheofharain.

Thuirt manaidsear Chaley Thistle, Richie Foran, gu bheil cothrom aca fhathast fuireach sa Phrìomh Lìog - ma 's e is gum buannaich iad na 4 geamaichean mu dheireadh aca.

Bha Foran a' bruidhinn às dèidh dha Inbhir Nis call 4-0 ri Ross County ann an Inbhir Pheofharain.

Dh'fhàs cùisean fiù 's na bu mhiosa dha Inbhir Nis Disathairne is Dùn Dè a' soirbheachadh 3-2 ann an Tobar na Màthar.

Tha sin a' fàgail ICT 7 puingean air deireadh aig bonn na lìge.

Chaidh dithis de ghaisgich Inbhir Nis, Teàrlach Christie is Barry Wilson, an sàs cuideachd le slaicean air mar a tha an cluba ga ruith.

Dòchas

Thuirt am manaidsear, ge-tà, gu bheil an sgioba fhathast le cothrom fuireach sa Phrìomh Lìog.

"Tha e nas duilghe ach chan eil e do-dhèante", thuirt Foran.

"Tha 12 phuing air fhàgail. Ma gheibh sinn 12 phuing tha fìor dheagh chothrom againn, ach gu follaiseach tha e gu bhith doirbh a-nise", thuirt e.

B' e trì puingean luachmhor a bh' ann airson Ross County.

Tadhail

Thàinig na tadhail air fad bho Liam Boyce is an t-Èireannach air 9 tadhail a chur an aghaidh ICT air an t-seusan seo e fhèin.

Tha County a-nise cha mhòr cinnteach nach crìochnaich iad aig bonn na lìge, ged a tha obair fhathast aca ri ri dhèanamh gus geama dearbhaidh an aghaidh sgioba bhon Championship a sheachnadh.

"Cha bhi sinn aig a' bhonn ach chan eil sinn sàbhailte fhathast", thuirt manaidsear Chounty, Jim Mac an t-Saoir.

"Feumaidh sinn barrachd phuingean fhaighinn.

"Thuirt mi nuair nach d' fhuair sinn dhan phrìomh shia gun robh mi airson crìochnachadh san t-seachdamh àite. Sin an targaid", thuirt e.

Thig Hamaltan a dh'Inbhir Nis Disathairne, is County air falbh an aghaidh Thobar na Màthar.