Naidheachdan 11:00m
Cha chluich seo air an uidheamachd agaibh

Naidheachdan 11:00m

28 An Giblean 2017 Ùraichte aig Ùraichte aig

Lunnainn

Thuirt Scotland Yard gun do cuir iad stad air plana airson ceannairc an dèidh rèid ann an ceann an iar thuath Lunnainn an-raoir. Tha boireannach san ospadal an dèidh do phoileas losgadh oirre agus tha an Coimisean airson Gearanan mun Phoileas a' rannsachadh na cùise a tha sin. Tha sianar eile an grèim.

RBS

Rinn Banca Rìoghail na h-Alba prothaid de £259m air a' chiad thrì mìosan am-bliadhna, an dèidh call £1bn aig an aon àm an-uiridh. Thuirt RBS, a bhoineas anns a' mhòr-chuid dhan stàit an dèidh cobhair a rinn an Riaghaltas air a' bhuidhinn, gu bheil iad nas fhaide air adhart na bha dùill le plana airson cosgaisean a ghearradh.

Poilis

Tha dragh ann mu phlana Poilis Alba airson camarathan-bodhaig do dh'oifigearan a chur an sàs air feadh na dùthcha, an dèidh trioblaidean leis an uidheamachd. Chaidh na camarathan fheuchainn air poilis ann an ceann an ear thuath na h-Alba agus thàinig laisgean am follais. Tha Poilis Alba ag ràdh, ge-tà, gur ann leis na coimpiutairean aca as motha a bha na trioblaidean agus nach ann leis na camarathan.

Brexit

Tha Riaghaltas na Rìoghachd Aonaichte ag ullachadh laghan ùra a bheir cead dhaibh smachd-bhannan a chur air dùthchannan eile an dèidh Brexit. Mhothaich an Riaghaltas an t-seachdain seo chaidh gun cailleadh iad a' mhòr-chuid de na cumhachdan sin an dèidh falbh às an Aonadh Eòrpach. Feumaidh Breatainn an-dràsta, cha mhòr a h-uile turas, lagh an EU a chleachdadh airson casg siubhail no casg malairt a chur air dùthaich eile.

Àranais

Fhuair gàrradh Àranais ann an Leòdhas tuilleadh obrach airson tuath-gaoithe mòr Bheatrice far chladaichean Ghallaibh. Cumaidh seo cosnadh ris a' ghàrradh gu deireadh na bliadhna agus feumaidh luchd-obrach a thoirt à Tìr-Mòr.

Geòidh

Tha ball nan Eilean Siar ann am Pàrlamaid na h-Alba, Alasdair Allan, ag ràdh gum feum tuilleadh a dhèanamh airson smachd a chur air na geòidh ann Uibhist a Tuath. Tha croitearan a' gearain mun chron a tha na cathain gu h-àraidh a' dèanamh air an ionaltradh.