Naidheachdan 11:00m
Cha chluich seo air an uidheamachd agaibh

Naidheachdan 11:00m

9 Am Màrt 2017 Ùraichte aig Ùraichte aig

Buidseat

Chuir an Seansalair dìon air a phlana airson cìsean Àrachais Nàiseanta a chur suas air feadhainn a tha ag obair dhaibh fhèin. Thug cùl-bheingearan Tòraidheach an aghaidh air Phillip Hammond 's iad ag ràdh gun do bhris e gealltanas a thug iad seachad ron taghadh. Thuirt Mgr Hammond gun èist e ris na Buill-Phàrlamaid, ach thuirt e gu bheil an siostam a th' ann an-dràsta gu mòr am fàbhar dhaoine a tha an ceann an cosnaidh dhaibh fhèin.

Achd Croitearachd

Tha comataidh aig Holyrood ag iarraidh air Riaghaltas na h-Alba Bile ùr na Croitearachd a chur mu choinneimh na Pàrlamaid ann an Dùn Èideann ron ath-thaghadh. Tha aithisg ùr bho Chomataidh na h-Eaconamaidh Dùthchail ag ràdh gu bheil soilleireachadh a dhìth air poileasaidh an Riaghaltais air croitearachd agus air dleastanas Choimisean na Croitearachd.

IT nam Poileas

Dh'iarr Buidheann-Sgrùdaidh na h-Alba air na Poilis sùil anns an aithghearrachd a thoirt air an t-siostam IT aca. Tha sin an dèidh do phròiseact coimpiutair nàiseanta ùr do Phoileas Alba, a chosg £46m tuiteam às a chèile. Thuirt an t-Àrd-Neach-Sgrùdaidh, Caroline Gardner, nach tàinig am fàileachadh am follais gus an d' fhuair na Poilis an siostam ùr airson deuchainn a dhèanamh air. Bha dùil gun cùmhnadh an siostam ùr £200m dha na Poilis.

Na Stàitean Aonaichte

Tha coltas ann gun do thuit an àireamh a dh'fheuch ri faighinn a-steach dha na Stàitean Aonaichte gu mì-laghail anns a' chiad ghreis de cheannas Dhòmhnaill Thrump. Thuirt Rùnaire Tèarainteachd na dùthcha gun deach 40% nas lugha a chur an grèim air a' chrìch ri Meagsago anns a' Ghearran na bh' ann dhiubh anns an Fhaoilleach.

Banca a' Cho-op

Bha call bliadhnail de £470m air Banca a' Cho-op. Thuirt am banca, a chaidh air a' mhargaidh airson a reic air a' mhìos a chaidh, gur e riadh ìosail agus cosgais an aonta le Comann Togalach Britannia as motha as coireach ris a' chall.

Ceangal-rathad an Iar Inbhir Nis

Tha dùil gun tèid an spàrr mu dheireadh anns an drochaid ùr air Abhainn Nis an-diugh. Bidh an drochaid aig Muileann Thuilm a' ceangal rathad an A82 ris an A96 mar phàirt de shlighe ùir air taobh siar Inbhir Nis a chosgas £55m agus ris a bheil dùil a bhith fosgailte ann an 2020.