Naidheachdan 11:00m
Cha chluich seo air an uidheamachd agaibh

Naidheachdan 11:00m

2 Am Màrt 2017 Ùraichte aig Ùraichte aig

Brexit

Feuchaidh ministearan an Riaghaltais ri cur às do cho-dhùnadh Thaigh nam Morairean an aghaidh a' bhile airson Brexit. Tillidh am bile a Thaigh nan Cumantan an ceann cola-deug an dèidh dha na Morairean bhòtadh a-raoir airson leasachadh ag iarraidh dìon air còirichean dhaoine a bhuineas do dhùthchannan eile anns an Aonadh-Eòrpach ach a tha a' fuireach ann am Breatainn.

Jeff Sessions

Tha cuideam a dhreuchd fhàgail a' sìor fhàs air fear de dhlùth-chomhairlichean a' Chinn-Suidhe Trump, Jeff Sessions, an dèidh dha tighinn am follais gun do chùm e am falach coinneamhan a bh' aige le Tosgaire na Ruis nuair a bha iomairt taghaidh a' Chinn-Suidhe a' dol air adhart sna Stàitean Aonaichte. Mar àrd-fhear-lagha tha Mgr Sessions os cionn obair an FBI a tha an-dràsta fhèin a' rannsachadh chasaidean gun do ghabh an Ruis gnothach ris an taghadh.

Loganair

Chuir àrd-stiùiriche Loganair, Ionatan Hinkles, dìon air a' chlàr-ama ùr eadar Beinn nam Fadhla agus Steòrnabhagh. Tha muinntir Bharraigh a' gearain nach eil an clàr-ama ùr a thòisicheas air an ath-mhìos gu feum sam bith dhaibhsan ma tha iad ag iarraidh a Steòrnabhagh. Dh'innis Mgr Hinkles do Chomhairle nan Eilean Siar nach do chleachd seirbheis na maiden eadar Beinn nam Fadhla agus Steòrnabhagh fad na bliadhna an-uiridh, ach 59 duine à Barraigh.

An Fhadhail a Deas

Nì Comhairle nan Eilean Siar sgrùdadh às ùr air a' chabhsair eadar Beinn nam Fadhla agus Uibhist a Deas fhosgladh nas fheàrr gu sruth na mara. Tha feadhainn gu làidir den bheachd gur e cho dùinte 's a tha an drochaid air an Fhadhail a Deas a bu choireach ris an tuil mhòir o chionn dusan bliadhna anns an do chaill còignear am beatha.

Bhanaichean Tesco

Tha dragh air feadhainn air taobh siar Rois gum bi bùthainnean beaga san sgìre a' dùnadh le buaidh nam bhanaichean a tha Tesco a' cur dhan taobh siar. Thuirt Tesco gu bheil an luchd-cleachdaidh ag innse dhaibhsan anns na coimhearsnachdan air feadh na Gàidhealtachd 's nan Eilean air a bheil na bhanaichean a' frithealadh gu bheil iad a' cur luach mhòir air an stuth 's an t-seirbheis a tha iad a' toirt dhaibh.

PPI

Thuirt Ùghdarras Modh an Ionmhais gu bheil gu deireadh an Lùnastail 2019 aig luchd-cleachdaidh airgead-dìolaidh iarraidh ma tha iad den bheachd gun deach àrachas PPI air nach robh feum aca a reic riutha. Tha na bancaichean air còrr is £24bn a phàigheadh a-mach mar thà ann an airgead-dìolaidh.