Naidheachdan 11:00m
Cha chluich seo air an uidheamachd agaibh

Naidheachdan 11:00m

1 Am Màrt 2017 Ùraichte aig Ùraichte aig

Foghlam

Tha Comataidh an Fhoghlaim ann am Pàrlamaid na h-Alba a' gabhail fianais an diugh air taic do chloinn-sgoile aig a bheil feumalachdan sònraichte. Ged a tha an àireamh cloinne anns an t-suidheachadh sin air èirigh mu leth uidhir a-rithist air a' chòig bliadhna mu dheireadh tha an àireamh thidsearan mu choinneimh sin air tuiteam. Tha a' chomataidh a' gabhail fianais bho phàrantan, tidsearan agus ceannardan polasaidh.

Fònaichean-làimhe

Thèid càin nas motha bho an diugh air draibhearan a thèid a ghlacadh a' cleachdadh fòn-làimhe nuair a tha air cùl na cuibhle. Thèid an àireamh phuingean suas bho 3 gu 6 agus a' chàin airgid bho £100 gu £200 agus dh'fhaodadh draibhearan ùra an cead-draibhidh a chall.

Tubaist rathaid

Chaidh oifigear poileis a dhroch ghoirteachadh ann an tubaisd eadar dà charbad ann an Siorrachd Obair Dheathainn a-raoir. Bha an t-oifigear, a tha 46, a' draibheadh bhan poileis a bha ann an tubaisd le càr eile air an A90 faisg air Bàgh Chroch Dain mu mheadhan oidhche. Tha an duine a bha a' draibheadh a chàir e fhèin san ospadal ged nach deach a dhroch leòn .

Trump

Dh'iarr an Ceann-suidhe Trump air luchd-poileataigs bho gach taobh aimhreit eatorra a chuir an dàrna taobh agus Aimeireagaidh a thoirt còmhla. Thuirt Mgr Trump na chiad òraid mar cheann-suidhe dhan Chòmhdhail gu bheil e 'son 'spiorad' nan Stàitean Aonaichte' a dhùsgadh as ùr.

Seirbheis adhair

Tha muinntir Bharraigh a' gearain air clàr-ama ùr nan seirbhisean adhair eadar Beinn na Bhaoghla is Steòrnabhagh bhon ath mhìos. Ged a bhios seirbheis ann còig là san t-seachdainn tha na h-uairean siubhail a' ciallachadh nach tèid aig duine a tha a' fàgail Bharraigh air faighinn a Steòrnabhagh ro chòig uairean feasgar air an aon là.