Naidheachdan 11:00m
Cha chluich seo air an uidheamachd agaibh

Naidheachdan 11:00m

2 An Dùbhlachd 2016 Ùraichte aig Ùraichte aig

Qinetiq

Thàinig dearbhadh an-diugh, le leudachadh air cùmhnant na companaidh Qinetiq, gum fuirich raon deuchainn an MOD ann an Uibhist fosgailte gu 2028 air a' char as tràithe. Tha an cùmhnant anns a bheil luach £1bn uile-gu-lèir, bhon Riaghaltas, a' ciallachadh gun tèid £95m a chosg air leasachadh, eadar raon rocaid Uibhist agus Aberporth anns a' Chuimrigh, a tha Qinetiq a' ruith do Mhinistreachd an Dìon. Bidh leasachadh ann cuideachd air na goireasan aig ionad an MOD aig Boscombe Down ann an Wiltshire.

Fo-thaghadh

Thuirt ceannard nan Libearalach Deamocratach, Tim Farron, gu bheil iad air an t-slighe air ais an dèidh fo-thaghadh Richmond Park ann an Lunnainn, far an do rinn iad a' chùis air an t-seann bhall Tòraidh, Zac Goldsmith, aig an robh mòr-chuid de 23,000 aig an taghadh mu dheireadh. Dh'fhàg Mgr Goldsmith na Tòraidhean airson iomairt an aghaidh an treas raon-laighe aig Heathrow agus sheas e mar neo-eisimeileach. Bhòt e airson falbh às an Aonadh Eòrpach anns an referendum, agus 's ann air cuspair Brexit a bha iomairt an tagraiche Lib Deamaich, Sarah Olney, stèidhichte.

Boris Johnson

Thuirt Rùnaire nan Dùthchannan Cèine, Boris Johnson, gur e iomairt airson malairt shaoir air feadh an t-saoghail an rud as motha a tha ro Bhreatainn an dèidh falbh às an Aonadh Eòrpach. Agus thuirt Mgr Johnson, na chiad òraid mhòir air poileasaidh chèin, gun tig buannachdan mòra às in-imreachd ach gu bheil e cudromach smachd a chumail air na h-àireamhan.

Poilis

Thug rannsachadh a rinn am BBC laigsean am follais anns an dòigh anns a bheil Poilis na h-Alba a' dèiligeadh ri gairm èiginn. Chaidh còrr 's 80 cùis a chlàradh ann an ionadan-fòn nam Poileas bhon Ghiblean am-bliadhna far an do theab mearachd a bhith ann. Thuirt na Poilis nach eil an sin ach aon chùis anns a h-uile 22,500 gairm èiginn a tha iad a' faighinn.

Faraidhean Rèile

Bidh àrdachadh de 2.3% sa chumantas air faradh rèile bhon ath-mhìos. Dh'innis an Riaghaltas ron seo gun tèid 1.9% air faradh rèile sa chumantas air a bheil smachd aca, agus tiogaidean seusain am measg sin.

Càball

Thuirt Siamarlan Urras Steòrnabhaigh, Iain MacÌomhair, gum biodh e cunnartach dha na h-Eileanan an Iar cùl a chur ris an iomairt airson càball dealain ùir tarsainn a' Chuain Sgìth. Dh'aidich e gur e buille a th' ann gu bheil Riaghaltas Westminster ag ràdh nach toir iad taic do chàball ùr gun dearbhadh gu bheil sin a dhìth, ach thuirt e nach eil roghainn aig na h-eileanan ach leantainn na strì airson càball ùir.