Cead do chomataidh ùr an Col Uarach

  • 23 An t-Samhain 2016
Uan

Thèid cothrom a thoirt do chroitearan ann an Col Uarach ann an Leòdhas comataidh ionaltraidh ùr a thaghadh, agus riaghailtean ionaltraidh a tharraing ri chèile iad fhèin.

Choinnich croitearan na sgìre - bho gach taobh den deasbad a bh' ann - ri àrd-oifigear eadar-amail Choimisean na Croitearachd, Bill Barron, oidhche Mhàirt.

Thuirt Mgr Barron gun robh toil aig a' choinneimh feuchainn ri gluasad air adhart às dèidh bliadhna de dh'aimhreit agus mì-chinnt, agus Coimisean na Croitearachd air comataidh Chuil Uaraich a chur às an dreuchd.

Thuirt e gum feumar comataidh ionaltraidh ùr a thaghadh, agus gum faodadh i riaghailtean ionaltraidh a tharraing ri chèile.

Thuirt e gum bi e an urra ris a' chomataidh an gabhadh iad ri molaidhean bho Chailean Soutar, a bha na chonastabal ionaltraidh san sgìre nuair nach robh comataidh ann.

Cha chanadh Mgr Barron dad mu ghnothaichean a chuir an conastabal gu ruige na poilis mu dheidhinn rathad a chaidh a dhèanamh ann an Gearraidh Ghuirm gus an gabhadh taighean a thogail.

Tha cuid de na croitearan ag ràdh gu bheil iad fhathast gun leabhraichean a' bhaile fhaighinn, no mìneachadh fhaighinn air ciamar a fhuair an conastabal smachd air airgead a' bhaile.

Dh'innis Mgr Barron cuideachd gum bi an ath choinneamh de Choimisean na Croitearachd ann air an 14mh den Dùbhlachd.

Dh'iarr am bòrd-stiùiridh roimhe air an fhear-gairm, Cailean Ceanadach, a dhreuchd fhàgail, ach thuirt Mgr Barron gu bheil e an urra ris an fhear-gairm agus an Riaghaltas dè thachradh a thaobh sin.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile