Stiùidio
Cha chluich seo air an uidheamachd agaibh

Naidheachdan 11:00m

26 Am Faoilleach 2016 Ùraichte aig Ùraichte aig

Tesco

Cho-dhùin sgrùdadh gu bheil Tesco an dèidh a bhith a' cur maill air pàigheadh gu daoine a tha a' reic riutha, rud a tha an aghaidh còd laghail. Lorg an sgrùdadh cuideachd gun robh iad a' gearradh pàighidh gun a bhith ag innse.

Còmhdhail

Tha frasan uisge agus gaoth làidir a' toirt buaidh air còmhdhail air feadh na dùthcha. Tha an A1 aig Dùn Bàrr dùinte gach taobh às dèidh mar a chuir a' ghaoth dà làraidh air an cliathaichean. Air an M8 dh'fhalbh a' ghaoth le dà phortacabin a bh' air làraidh. Tha cuid de sheirbheisean aiseig dheth, agus tha maill air mòran eile. Cuideachd tha SEPA air 40 rabhadh mu thuiltean a chur a-mach.

An A9

Tha an àireamh de thubaistean a bh' air an A9 air tuiteam anns a' chiad bhliadhna a bha na camarathan-astair chuimheasaich ann. Chaidh dithis na bu lugha a mharbhadh, agus chaidh 16 na bu lugha a dhroch ghoirteachadh ann an tubaistean eadar Dùn Bhlathainn agus Inbhir Nis. Eadar an t-Iuchar agus an Dùbhlachd an-uiridh cha deach duine a mharbhadh air an A9. Cha do thachair sin bho na 70an.

Rutherglen

Tha na Poilis a' coimhead ri tubaist-rathaid ann an Rutherglen a dh'fhàg balach, 14, anns an ospadal mar oidhirp air murt. Chaidh am balach a bhualadh le Vauxhall Corsa feasgar na Sàbaid.

Taghadh

Ceud là bho an-diugh bidh muinntir na h-Alba a' bhòtadh ann an taghadh Holyrood. Tha na cunntasan beachd a' cur an SNP pìos math air thoiseach air na pàrtaidhean eile.

Buidseatan nan Ùghdarrasan Ionadail

Tha còmhraidhean gan cumail an-diugh gus fuasgladh air choireigin fhaighinn air buidseatan nan ùghdarrasan ionadail. Coinnichidh àrd-chomhairlichean bho na prìomh phàrtaidhean ri Rùnaire an Ionmhais, Iain Swinney, agus iad a' sùileachadh barrachd mìneachaidh bhuaithe air na tha iad a' faighinn bhon Riaghaltas.