Eaglais ùr am Baile Dhùbhthaich

  • 22 An Dàmhair 2015
An t-àite a cheannaich an Eaglais Shaor ann am Baile Dhubhthaich
Image caption Bha grunn bhuidhnean ag iarraidh an togalach a cheannach

Feumaidh coithional na h-Eaglaise Saoire ann Baile Dhùbhthaich mu £1m a thogail airson eaglais ùr fhaighinn dhaibh fhèin.

Tha an togalach anns a bheil an coithional an-dràsta ro bheag dhaibh, agus shoirbhich leotha nan oidhirp togalach faisg air làimhe a cheannach.

Bha seo a dh'aindeoin 's gun robh buidhnean eile cuideachd ga iarraidh mar làrach airson taighean ùra.

Seann eaglais

Tha an togalach anns a bheil an coithional an-dràsta a' fàs aosta, agus tha obair mhòr an cois a bhith ga chumail aig ìre.

Tha cuideachd àrdachadh air tighinn air an àireamh dhaoine a tha a' frithealadh na h-eaglaise 's barrachd rùim a-nis a dhìth orra.

Tha ministear na h-eaglaise, an t-Urr. Alasdair MacAmhlaigh, ag ràdh gur ann a-nis a thòisicheas an obair gu ceart.

"Cha b' fhiach dhuinn a dhol a dh'fhastadh ailtirean agus daoine airson planaichean a dhèanamh ron seo oir cha robh càil a ghealltanas ann gum faigheadh sinn an làrach ach feumaidh sinn tòiseachadh air a h-uile càil a tha sin a-nis - feumaidh sinn tòiseachadh a' lorg airgid".

"Tha iad a' cumail a-mach gu bheil e a' cosg mu £1m eaglais ùr a thogail an-diugh".

Tha e misneachail ge-tà, gun tèid aca air am pròiseact a thoirt gu buil.

"'S e obair mhòr a th' ann - 's dòcha gun toir e dhà neo trì bliadhnaichean".

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile