Còmhraidhean "feumail" mu stailc Chal Mac

  • 18 An t-Ogmhìos 2015
An MV Loch Seaforth
Image caption Tha aonadh an RMT air stailc a ghairm air Dihaoine an 26mh là den Ògmhios

Thuirt ceannardan aonaidh gun deach "còmhraidhean feumail" a chumail eadar iad fhèin agus buidheann-stiùiridh na companaidh Cal Mac 's an dà thaobh a' feuchainn ri stailc an ath-sheachdain a sheachnadh.

Choinnich riochdairean bho aonadh an RMT agus cheannardan Chal Mac Diardaoin.

Ghairm an RMT stailc air Dihaoine an 26mh là den Ògmhios 's iad mì-thoilichte le atharrachaidhean ri siostam nam peinnseanan, agus dragh orra mu thèarainteachd-cosnaidh agus cùmhnantan obrach.

Bhiodh casg cuideachd air luchd-obrach bho bhith ag obair uairean a bharrachd Diciadain agus Diardaoin air seachdain na stailce.

Thuirt Gòrdan Màrtainn bhon aonadh nach e stailc a chumail a mhiannaicheadh iad fhèin, ach gun do sheall baileat am measg luchd-obrach na companaidh gun robh 92% de na ghabh pàirt ann deònach coiseachd a-mach air stailc.

Tha iad-san a' sireadh, thuirt e, gealltanas bho Chal Mac nach atharraich cùmhnantan an luchd-obrach fo chùmhnant ùr nan seirbheisean aiseig a thòisicheas an ath-bhliadhna.

Cùmhnant

Tha a' chompanaidh phrìobhaideach SERCO a' strì ri Cal Mac airson a' chùmhnant ùir.

Thuirt Fear-gairm Chomhairle nan Eilean Siar, Tormod Dòmhnallach, nach robh adhbhar sam bith ann an cùmhnant a chur a-mach gu tairgse, ach chaidh Ministear na Còmhdhail agus nan Eilean, Derek MacAoidh BPA, às àicheadh sin.

Thuirt e cuideachd gum bi ge bith dè a' chompanaidh a gheibh an cùmhnant ùr fhathast fo smachd Riaghaltas na h-Alba agus nach e oidhirp a tha seo seirbheisean aiseig nan Innse Gall agus Chluaidh a chur dhan roinn phrìobhaidich.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile