Fòram Còmhdhail ùr dha na h-Eileanan

  • 3 An t-Ogmhìos 2015
An MV Loch Seaforth
Image caption 'S e amas na buidhne ùire, ro-innleachd còmhdhail a stèidheachadh.

Chaidh Fòram Còmhdhail ùr a stèidheachadh a bheachdaicheas air gnothaichean còmhdhail a bheir buaidh air na h-Eileanan.

Chaidh gabhail ris a' phlana aig coinneimh de Bhuidhinn Ghnìomha nan Eilean ann an Arcaibh.

Bithear a' beachdachadh air seirbheisean aiseig, adhair 's eile, agus air mar a ghabhas piseach a thoirt air a' cho-obrachadh eadar ùghdarrasan ionadail agus Còmhdhail Alba.

"A' coimhead air adhart"

Thuirt Fear-gairm Chomhairle nan Eilean Siar, Tormod Dòmhnallach, gur e amas na buidhne ùire a bhith a' coimhead air adhart, seach a bhith a' dèiligeadh ri suidheachaidhean mar a dh'èiricheas iad.

"Tha mi a' smaoineachadh gur e sin fear de na rudan a tha sinn air ionnsachadh anns na dhà neo trì bhliadhnaichean a chaidh seachad - gum bu chòir dhuinn a bhith a' coimhead pìos romhainn" thuirt e.

Tha a' bhuidheann HiTrans mar-thà a' dèiligeadh ri gnothaichean còmhdhail na Gàidhealtachd 's nan Eilean ach tha Mgr. Dòmhnallach a' dèanamh dheth gu bheil buidheann ùr a dhìth a dhèiligeas ri feumalachdan sònraichte nan Eilean.

"Tha sinn air a bhith a' faicinn thairis air na bliadhnaichean, strì mhòr ga dhèanamh airson atharrachaichean bunaiteach a thoirt air còmhdhail anns na h-Eileanan agus tha sin air ùine mhòr a thoirt. Tha sinn a' smaoineachadh ma bhios a' bhuidheann seo ann - agus gu bheil an Riaghaltas mar phàirt mhòr dheth seo - gum bi e nas fhasa dhuinn gluasad air adhart le na rudan seo".

Coinnichidh a' bhuidheann ùr dà thuras sa bhliadhna, le riochdairean bho na diofar chomhairlean eileanach gu bhith an làthair.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile