Stiùidio
Cha chluich seo air an uidheamachd agaibh

Naidheachdan 11:00m

29 An Dùbhlachd 2014 Ùraichte aig Ùraichte aig

Itealan

Thuirt oifigich ann an Indonèisia gun deach stuth coltach ri sprùilleach fhaicinn sa mhuir 's iad a' coimhead airson an itealain le Air Asia a chaidh a dhìth an-dè air a slighe a Singapore. Thuirt àrd-oifigeach aig buidheann teasairginn Indonèisia gu bheil a h-uile coltas ann gun deach am plèana air an robh 162 de luchd-siubhail agus criutha, gu grunnd na mara.

Bàt-aiseig

Tha droch shìde a' cur maill air luchd-teasairginn a tha a' feuchainn ri cobhair a dhèanamh air feadhainn a tha fhathast glacte air bàt-aiseig Eadailteach a tha na teine anns an Adriatic. Thuirt oifigeach anns a' Ghrèig gun deach còrr is 200 a thoirt far a' bhàta, na bu tràithe an-diugh. Chaill aon duine a bheatha an-dè nuair a leum e far a' bhàta, an Norman Atlantic, a chaidh na teine anns a' mhadainn an-dè.

City Link

Chaidh comhairle a thoirt air feadhainn a tha a' feitheamh pharsailean bhon chompanaidh City Link an togail an-diugh. Tha dùil gum bi ionadan na companaidh fosgailte airson a' chiad uair bho chaidh a' chompanaidh gu rianachd air Là na Nollaige. Tha cha-mhòr 3,000 duine ag obair aig City Link, agus tha mòran dhiubh an cunnart an cosnadh a chall. Tha feadhainn dhiubh a' togail fianais aig ionad na companaidh ann an Tobar na Màthar an-diugh.

A' Ghrèig

Dh'fhailich air Riaghaltas na Grèige le an oidhirp mu dheireadh toirt air Pàrlamaid na dùthcha gabhail ri an tagraiche airson dreuchd a' Chinn-Suidhe. Tha sin a' ciallachadh gum bu taghadh coitcheann ann, agus na cunntasan beachd a' cur pàrtaidh a tha a' moladh tuilleadh ghearraidhean agus cùmhnadh airgid anns a' chiad àite. Thuit còrr is 10% far luach nan earrainnean sa Ghrèig an dèidh na naidheachd.

Rannsachadh Tubaist Bhàsmhoir

Bidh rannsachadh FAI ann mu bhàs dràibhear làraidh ann an tubaist ann an Uibhist a Tuath san Damhair an-uiridh. Tha dùil gun robh Stephen Bochannan, a bha 40 bliadhna de dh'aois, a' cur lìn air làraidh aig Loch Euphort ann an Uibhist a Tuath, nuair a thachair an tubaist anns an Damhair ann an 2013. Bidh an rannsachadh a' tòiseachadh air an 2na là den Mhàrt.