Na Hearaich air tarraing a-mach

  • 27 An t-Samhain 2014
Sgioba na Hearadh Image copyright Sgioba Ball Coise na Hearadh
Image caption Cha bhi na Hearaich a' cluich san lìog ann an 2015.

Cha bhi sgioba na Hearadh ann an Lìog Leòdhais agus na Hearadh ann an 2015 agus coinneamh bhliadhnail a' chluba air co-dhùnadh tarraing a-mach às an lìog airson bliadhna co-dhiù.

Chrìochnaich na Hearadh aig bonn na lìge am-bliadhna is iad air na geamaichean air fad aca a chall.

Gu dearbh, cha do bhuannaich na Hearaich geama bho bhuannaich iad Cupa Eilein an Fhraoich ann an 2011.

Bheachdaich iad air tarraing a-mach às an lìog aig deireadh seusain 2012 ach chaidh co-dhùnadh an uair sin cumail a' dol.

Piseach

Cha tàinig piseach air gnothaichean ge-tà, is chaidh aontachadh aig a' choinneimh bhliadhnail an sgioba a thoirt às an lìog 'son seusan 2015 co-dhiù.

Cuiridh iad sgioba air adhart ge-tà airson Cupa Eilein an Fhraoich is dòchas ann gum brosnaich sin daoine a dhol an sàs san sgioba.

Thèid co-dhùnadh a dhèanamh an ath-bhliadhna am feuch an cluba air tilleadh dhan lìog ann an 2016.

Chaidh taing sònraichte a thoirt dha na cluicheadairean agus do choidsichean na sgioba airson a bhith cho dealasach.