Ceistean a' nochdadh mun Loch Seaforth

  • 7 An t-Samhain 2014
MV Loch Seaforth Image copyright AP
Image caption Tha am bàta ùr dà mhìos air dheireadh, agus gun na calaidhean deiseil.

Thuirt BP nan Eilean Siar, Aonghas Brianan MacNèill, gum bu chòir rannsachadh a bhith ann mun phròiseas airson aiseig an MV Loch Seaforth a chur air an t-seòladh eadar Steòrnabhagh 's Ulapul.

Bha e a' bruidhinn mun naidheachd gum faodadh an t-slighe a bhith gun bhàta chàraichean airson sia seachdainnean an ath-bhliadhna, is an alt-aiseag ann an Ulapul ga ùrachadh.

"Tha seo caran air nochdadh mar chloich bhon adhair airson gu leòr de dhaoine," thuirt Mgr MacNèill.

"Tha iad mì-thoilichte gu bheil e a' tachairt mar seo.

"Mì-thoilichte gu h-àraid nach deach innse ceart dhan choimhearsnachd nach eil ann ach trì mìosan no mar sin gus am bi iad am beachd seo a thòiseachadh.

"Tha mi a' smaointinn nach eil e ceart no math idir.

"Agus tha mi a' smaoineachadh cuideachd gum feum seòrsa de sgrùdadh a dhèanamh air dè dìreach a th' air a bhith a' tachairt leis an Loch Seaforth o chionn 's gun robh còir aice a bhith an seo o chionn dà mhìos a-niste.

"Agus tha sinn a' faicinn gu bheil i air airgead mòr a chosg - cuid de dhaoine ag ràdh, an t-airgead a tha i air cosg air tìr, gum pàigheadh e airson dà bhàta leithid an Clansman, no an Hebrides no an Isle of Lewis fhèin.

"Tha ceistean mòra a-niste a' nochdadh 's gur e seo dìreach am pìos mu dheireadh a th' air daoine a shàrachadh," thuirt e.