Dragh mu shalachar air Beinn MacDuibh

  • 14 An Dàmhair 2014
Image copyright Graham Ellis/Geograph
Image caption 'S e Beinn MacDuibh an dàrna beinn as àirde ann am Breatainn.

Tha na tha de shalachar dhaonna ga fhàgail air mullach Beinn MacDuibh anns a' Mhonadh Ruadh a' cur dragh air na buidhnean carthannais leis a bheil i.

'S e Beinn MacDuibh an dàrna beinn as àirde ann am Breatainn.

Ach tha Comann Rìoghail Dìon nan Eun (RSPB) agus Urras Nàiseanta na h-Alba (NTS) ag ràdh gu bheil salachar air a lorg fiù 's ann an seann tobhtaichean air a' bheinn far am bi daoine a' gabhail fasgadh ann an droch shìde.

Dh'iarr iad air luchd-coiseachd gun a dhol dhan taigh-bheag air a' bheinn, ach ma dh'fheumas iad, an salachar aca a thiodhlacadh gus nach mill e a' bheinn do chàch.

Thuirt Jeremy Roberts, a tha na mhanaidsear air Tèarmann Obar Nithidh an RSPB, a tha a' gabhail a-steach pìos den bheinn: "Ghuidhinn air a h-uile duine a thig chun na beinne spèis a thoirt dhan àite mhìorbhailleach seo, agus an giùlain fhèin gu dòigheil.

"Fagadh sibh a' bheinn mar a dh'iarradh sibh a lorg.

"'S e àrainneachd air leth cugallach a th' ann, agus tha an leithid seo de dhol-a-mach a' milleadh na beinne don fheadhainn a thig thuice".

Tha pìos den bheinn cuideachd air Oighreachd Loidse Mhàrr, a tha leis an NTS. Thuirt Peter Holden, a tha na mhaor air an oighreachd, nach gabhar ris an "dol-a-mach mhì-shòisealta".

"Lorgar cuid den àrainneachd as iomallaiche agus as glana a th' againn air na mullaichean. Tha iad am measg nan làraichean as dùbhlannaiche airson luchd-tadhail, agus luchd-manaidsearachd.

"Dh'iarramaid air luchd-tadhail a bhith ag amas air a' phrionnsabal "Na Fàg Lorg" agus a bhith a' tiodhlacadh salachar dhaonna air falbh bho chlàr na beinne."

Dh'fhoillsich Comhairle Sreap na h-Alba stiùireadh air mar a bu chòir dèiligeadh ri salachar air a' bhlàr a-muigh o chionn ùine.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile