Stiùidio
Cha chluich seo air an uidheamachd agaibh

Naidheachdan 11:00m

17 An t-Sultain 2014 Ùraichte aig Ùraichte aig

Referendum

Tha gach taobh a' dèanamh iomairt dheireannach ron referendum air neo-eisimeileachd a-màireach. Tha am Prìomh Mhinistear, Ailig Salmond, air iarraidh air Albannaich gun an cothrom sealbh a ghabhail air an dùthaich aca fhèin a leigeil seachad. Thuirt e gun cumadh Alba an Not, oir gun aontaicheadh luchd-poileataigs gum biodh e ciallach do dhùthchannan eileanan Bhreatainn an aon airgead a bhith aca. Thuirt ceannard 'Nas Fheàrr Còmhla', Alasdair Darling, nach robh dad tìr-ghràinneach ann at bhòt an aghaidh neo-eisimeileachd, agus thuirt e gum biodh e traighideach nan deadh an Aonadh ri Sasainn, a' Chuimrigh agus Èirinn a Tuath a bhristeadh.

Obraichean

Thuit àireamhan cion-cosnaidh 15,000 ann an Alba eadar a' Chèitean agus an Iuchair. Tha an ìre de dhaoine a tha a' cosnadh ann an Alba a-niste a' seasamh aig 73.9%, cha-mhòr aon phuing nas àirde na an ìre airson na Rìoghachd Aonaichte anns an fharsaingeachd.

Thailand

Thuirt poilis a tha a' rannsachadh murt dhithis luchd-turais ann an Thailand gu bheil dithis fhireannach Bhreatannach a-niste fo amharas. Bha na daoine air a bhith ann an cuideachd Dhaibhidh Miller agus Hannah Witheridge mus deach am marbhadh air Eilean Koh Tao. Tha iad an-dràsta fo chùram nam poileas ann am Bangkok, ach cha deach an cuir an grèim.

Ebola

Thòisich deuchainnean gan dèanamh ann an Oxford an-diugh air banachdach airson an galair Ebola. B' e seo a' chiad uair a chaidh an droga ùr fheuchainn air mac-an-duine. Tha luchd-saidheans an dòchas, ma shoirbhicheas le na dearbhaidhean, gun gabh am banachdach a thoirt do luchd-obrach slàinte ann an Afraga an Iar ro dheireadh na bliadhna.

Riadh

Bhòt dithis de bhuill Comataidh Poileasaidh Ionmhasail Banca Shasainn na bu tràithe air a' mhìos airson ìre an rèidh a chur an-àirde. Airson an dàrna mìos sreath a chèile, dh'iarr iad gun deadh an ìre àrdachadh bho leth gu trì-chairteal de dh'aon percent. Bhòt an t-seachdnar bhall eile air a' chomataidh an aghaidh àrdachaidh agus dragh orra mu laigse eadar-amail ann an Sòn an Euro.

Cleasan-teine

Airson a' chiad uair, bidh aig daoine ri pàigheadh airson a bhith a' coimhead nan cleasan-teine ann an Lunnainn air Oidhche na Bliadhn' Ùire. Tha am Mèar, Boris Johnson, air fhoillseachadh gum bi 100,000 tiocaid ri fhaotainn airson nan cleasan, gun cosg iad £10 am fear, agus gum bi iad ri fhaotainn bhon 26mh là den t-Sultain. Gu ruige seo, tha cuirm nan cleasan-teine air a bhith saor an-asgaidh, agus iad a' tàladh suas ri leth mhillean a-steach gu meadhan a' phrìomh-bhaile.