Bàs ann an Coire an t-Sneachda

  • 3 An t-Sultain 2014
Coire an t-Sneachda Image copyright Richard Webb / Geograph
Image caption Coire an t-Sneachda

Chaill boireannach a beatha às dèidh tubaist fhad 's a bha i a' sreap air Druim Pigme ann an Coire an t-Sneachda Dimàirt.

Bha am boireannach, is dùil gun robh i eadar 50 is 60 bliadhna de dh'aois, am measg sianar a bha a' sreap ann an càraidean nuair a thachair an tubaist.

Chaidh fios a chur air na poilis mu 2.30 feasgar Dimàirt.

Chaidh iad os cionn iomairt-teasairginn le taic bho Sgioba-Teasairginn a' Chàirn Ghuirm agus heileacoptair an nèibhidh, ach cha b' urrainn dhaibh am boireannach a shàbhaladh.

Creag

"Bha iad a' sreap ann an càraidean agus an uair a bha an dithis mu dheireadh a' dol suas, thuit creag an ìre mhath mòr is bhuail e ann an ceann a' bhoireannaich," thuirt Uilleam MacAnndrais bho Sgioba-Teasairginn a' Chàirn Ghuirm.

"Cha robh duine air a' chreag a shaoradh, ach tha an t-uamhas de dh'uisge air a bhith againn agus tha tòrr de na creagan a' gluasad," thuirt e.

Thèid aithisg a chur gu Neach-casaid a' Chrùin.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile