Mìneachadh air poilis armaichte

Oifigearan armaichte Tha 275 de dh'oifigearan Phoilis na h-Alba a-nise a' giùlain ghunnaichean gu cunbhalach.

Sgeulachdan co-cheangailte

Thig mìneachadh bho Rùnaire a' Cheartais, Coinneach MasAsgaill, ann am Pàrlamaid na h-Alba Dimàirt a thaobh 's mar a tha cuid de phoilis a-nis a' giùlain ghunnaichean gu cunbhalach.

Tha grunn dhaoine, air a' Ghàidhealtachd gu h-àraidh, air gearan mun phoileasaidh, a dh'atharraich an-uiridh, is iad ag ràdh nach eil e iomchaidh dhan sgìre.

Tha Comhairle na Gàidhealtachd am measg an fheadhainn a tha a' cur na aghaidh agus iad air iarraidh air Poileas na h-Alba ath-sgrùdadh a dhèanamh air.

'S e am ball neo-eisimeileach dhan Ghàidhealtachd is na h-Eileanan, Iain Finnie, a bha uair na oifigear-poilis e fhèin, a thog na draghan an toiseach.

Thuirt e gu bheil feum air mìneachadh bho Mhgr MasAsgaill.

Sàbhailte

"Tha draghan mun seo a' siòr fhàs agus 's e an rud a tha a' nochdadh mar as trice, nach eil daoine a' faireachdainn dad nas sàbhailte air sgàth a' phoileasaidh a tha seo - gu dearbha chan eil iad a' faireachdainn cho sàbhailte 's a bha iad.

"Tha na poilis ann gus am bi daoine a' faireachdainn sàbhailte agus cuideachd, dha roinn a' cheartais air fad, feumaidh taic is earbsa an t-sluaigh a bhith aca, 's tha e fìor chudromach nach eil dad sam bith ann a tha a' cur bacadh air an sin," thuirt e.

Thuirt Àrd-Chonnstabal Phoileas na h-Alba, Sir Stephen House, mar-thà gum biodh ath-sgrùdadh ga dhèanamh air a' phoileasaidh co-dhiù air an ath mhìos.

Tha am feachd ag ràdh gu bheil 275 de na h-oifigearan aca a' giùlain ghunnaichean, mu 1.6% de na h-oifigearan a th' aca uile gu lèir.

'S e gunna taser agus gunna-làimh a tha ga chumail sa chrios a bhios aca.

Tuilleadh mun sgeulachd seo

Sgeulachdan co-cheangailte

Chan eil uallach air a' BhBC airson na tha air làraich-lìn eile.

Sgeulachdan aithriseach

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.