An Comh. Iain MacGriogair air caochladh

  • 29 An t-Luchar 2014

Chaochail an comhairliche ùr airson sgìre cheann a tuath an Òbain agus Latharna, Iain MacGriogair.

Bha e 62 bliadhna de dh'aois.

Bha Iain MacGriogair a' fuireach anns a' Choingheal, agus tha nas lugha na trì seachdainean ann bho chaidh a thaghadh mar chomhairliche.

B' ann leis a bha Taigh-òsta Lochnell Arms, Talla Chruinneachadh Earra-Ghàidheal agus a' bhùth, Highland Fasteners, anns an Òban, a thuilleadh air àiteachan eile thall 's a-bhos.

Bha e cuideachd an lùib a bhith a' reic agus a' ceannach fearainn.

Thathar ga chuimhneachadh mar dhuine a bha a' cur meas mhòr air gnothaichean teaghlaich agus an luchd-obrach aige; ach cuideachd mar dhuine aig an robh lèirsinn, agus anns an robh spionnadh.

Bhathar an làn-dùil gun cuireadh e beachdan ùra air adhart taobh a-staigh na Comhairle airson baile an Òbain ath-bheothachadh, agus a thaobh piseach a thoirt air turasachd agus gnìomhachas anns an fharsaingeachd ann an Earra-Ghàidheal.