Rannsachadh poblach ga iarraidh air sàbhailteachd heileacoptairean

  • 8 An t-Iuchar 2014
Sprùilleach Image copyright PA
Image caption B' e a' cheathramh tubaist de a leithid ann an còig bliadhna.

Dh'iarr Buill-Phàrlamaid gun tèid rannsachadh poblach a dhèanamh air co-dhiù tha cuideam bho chompanaidhean ola agus gas a' fàgail nach eil heileacoptairean a' Chuain a Tuath cho sàbhailte 's a bu chòir.

Tha Comataidh Thaghte na Còmhdhail cuideachd ag iarraidh sgrùdaidh iomlan a dhèanamh air a' ghnothach a th' aig Ùghdarras an Sgithealaich Shìobhalta (CAA) ris.

Tha na molaidhean an cois aithisg a tha ga foillseachadh an dèidh na tubaiste san tàinig heileacoptair Super Puma a-nuas sa mhuir far chosta Shealtainn ann an 2013.

Chaidh ceathrar luchd-siubhail a mharbhadh, anns a' cheathramh tubaist de a leithid ann an còig bliadhna.

Cultar burraidheachd

Thuirt cathraiche na Comataidh, Louise Ellman: "A dh'aindeoin na h-obrach a rinn an CAA, tha ceistean mòra fhathast a thaobh sàbhailteachd nan heileacoptairean ann an saoghal coimearsalta, farpaiseach a' Chuain a Tuath.

"Tha sinn draghail gu bheil sàbhailteachd a' fulang ri linn daoine a bhith coma.

"Cha deach cho èifeachdach 's a tha an CAA a sgrùdadh math gu leòr.

"Cha bhi de chumhachd 's de dh'ùghdarras ach aig làn-rannsachadh poblach neo-eisimeileach airson an gnothach a sgrùdadh ceart."

Thog na buill air mar a nochd an rannsachadh a rinn Meur Rannsachaidh nan Tubaistean Mara (AAIB) air an tubaist far Shealtainn na h-uimhir de dhraghan susbainteach.

Gu h-àraid, fhuair an AAIB nach eil mìneachadh ceart anns an fhiosrachadh a thugadh seachad do luchd-siubhail air thoiseach air an turas, air mar a chleachdar uidheam analachaidh èiginneach an heileacoptair.

Thogadh dragh cuideachd mu "chultar macho burraidheachd" ann an gnìomhachas na h-ola 's a' ghas, agus gun deach innse do luchd-obrach a thog dragh mu shàbhailteachd gum bu chòir dhaibh an obair fhàgail.

"An dèidh ceithir tubaistean ann an còig bliadhna, tuigear mar a tha misneachd an luchd-obrach sa Chuan a Tuath ann an sàbhailteachd nan heileacoptairean lag.

Laigsean

"Dh'innis feadhainn a thàinig tron tubaist beò dhuinn nach do chleachd iad an uidheamachd analachaidh èiginneach ri linn 's nach deach innse dhaibh ceart mar a chleachdadh iad e.

"Tha e uabhasach gum feumadh tubaist mharbhtach a bhith ann mus do nochd na laigsean a bh' anns an fhiosrachadh sin.

"Tha còir aig luchd-obrach sa Chuan a Tuath fios a bhith aca gu bheil a h-uile rud a ghabhas ga dhèanamh airson an cumail sàbhailte."

Thuirt labhraiche do Roinn na Còmhdail: "Tha e riatanach gum faod luchd-obrach sa Chuan a Tuath an obair aca a dhèanamh ann an àrainneachd shàbhailte. Tha sinn ag obair còmhla ris an CAA, mar an riaghladair neo-eisimeileach, air a' chùis chudromach seo.

"Tha sinn taingeil don Chomataidh airson na chuir iad ris a' chùis, agus bheir sinn freagairt foirmeil don aithisg aca an ceann ùine iomchaidh."

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile