Teine mòintich ann am Bràigh Mhàrr

  • 19 An t-Ogmhìos 2014
An teine ann an Gleann Laoigh Image copyright Other
Image caption Tha dùil gur e luchd-campachaidh mì-chùramach a dh'adhbharaich an teine.

Chuir luchd-smàlaidh smachd air teine mòintich mhòr ann am Bràigh Mhàrr, a mhill deich hectaire ceàrnagach de dh'fhearann a tha le Urras Nàiseanta na h-Alba.

Thòisich an teine tràth feasgar Diciadain ann an Gleann Laoigh, air Oighreachd Loidse Mhàrr.

Dh'obraich luchd-smàlaidh còmhla ri luchd-obrach bho oighreachdan Inbhir Chall, Bhaile Mhorail, Mhàrr agus Ghleann Tanar, airson smachd a chur air an teine a mhill deich hectaire cearnagach de dh'fhearann ann an Gleann Laoigh.

Chuireadh smachd air an teine ro 7:00f oidhche Chiadain.

Chaidh a dhearbhadh madainn Diardaoin gun deach preasan braoileige a mhilleadh, am measg chraobhan mòra giuthais.

Is coltach nach deach cron mòr a dhèanamh air na craobhan mòra fhèin, agus nach do ràinig an teine àirde gheugan na coille.

Tha dragh ann gur e mì-chùram a dh'adhbharaich an teine, agus cliath bharbeque air a lorg far an robh daoine air a bhith a' campachadh.

Tha an t-Urras Nàiseanta ag iarraidh air daoine teine a sheachnadh 's iad a' campachadh, gu h-àraid nuair a bhios tart ann.

Seach gu bheil turadh agus gaoth bheag ann fhathast, agus gabhail beag teine fhathast san talamh an àiteachan, tha an luchd-smàlaidh ri faire air an sgìre.