UKIP air seat Albannach fhaighinn sa Bhruiseil

  • 26 An Cèitean 2014
A' Phàrlamaid Eòrpach Image copyright VT Freeze Frame
Image caption Shoirbhich le pàrtaidhean an aghaidh an AE ann an iomadh dùthaich.

Tha UKIP air buannachd mhòr fhaighinn anns na taghaidhean Eòrpach.

Fhuair iad 27.5% den bhòt - barrachd na fhuair pàrtaidh sam bith eile ann am Breatainn - a' leigeil leotha 23 buill a chur chun na Pàrlamaid Eòrpaich.

Fhuair UKIP a' chiad seat Albannach aca sa Phàrlamaid Eòrpaich anns an taghadh.

Fhuair an SNP làmh an uachdair ann an Alba ach 's e pàrtaidh Nigel Farage a rinn a' chùis mu dheas.

60 Seata

Tha dithis bhall an-urra aig an SNP agus aig Làbaraich ann an Alba.

Cha bhi Lib-Deamach Albannach sa Phàrlamaid Eòrpaich ge-tà, agus iadsan air tighinn a-steach san t-siathamh àite, air dheireadh air UKIP agus air na h-Uainich.

Shoirbhich le pàrtaidhean na làimhe deise, agus pàrtaidhean a tha an aghaidh an AE ann an grunn dhùthchannan na Roinn Eòrpa.

San Fhraing chrìochnaich am Front National air thoiseach air pàrtaidhean eile na dùthcha 'son a' chiad uair a-riamh ann an taghadh nàiseanta.

Bidh am Front National a-niste a' cur eadar 23 agus 25 ball chun na Pàrlamaid Eòrpaich - seach an triùir bhall a bh' aca roimhe.

Anns an Danmhairg chunnacas barrachd taic do Phàrtaidh Pobaill na Danmhairge - a tha a' cur an aghaidh an AE - 's iad a' faighinn ceithir seataichean.

Rinn na pàrtaidhean a tha a' strì an aghaidh chruaidh-ghearraidhean riaghaltais anns a' Ghrèig agus anns an Spàinn adhartas cuideachd.

Sa Ghearmailt, 's iad pàrtaidh an t-Seansalair Angela Merkel, na Deamocrataich Chrìosdail, a b' fheàrr a rinn.

Anns an Eadailt shoirbhich leis a' Phàrtaidh Dheamocratach, a tha a' cur taic ris an AE.

'S iad Pàrtaidh Pobaill na Roinn Eòrpa fhathast a' bhuidheann as motha sa Phàrlamaid Eòrpaich, ach chaill iad mu 60 seata.