Togail do dh'iomairt FlySkye

  • 15 An Giblean 2014
Raon-laighe an Aiseig
Image caption Bha an raon-laighe ga chleachdadh suas gu 1988

Tha a' bhuidheann FlySkye, a tha ag iomairt airson seirbheisean adhair cunbhalach a-mach 's a-steach às an Eilean Sgitheanach, a' cur fàilte air seirbheis ùr le itealan-mara a thòisicheas air an ath-mhìos.

Tha a' chompanaidh Loch Lomond Seaplanes, a bhios a' ruith nan seirbheisean, ag ràdh gu bheil mòran dhaoine air ùidh a nochdadh annta mar-thà.

Leigidh na cuairtean le luchd-turais 's eile na seallaidhean as brèagha air an eilean fhaicinn bhon adhair.

Bidh tè de na h-itealain aca stèidhichte faisg air raon-laighe an Aiseig, ann an ceann a deas an eilein, thar mhìosan an t-samhraidh.

Seirbheisean cunbhalach

B' àbhaist do Loganair a bhith a' ruith sheirbheisean eadar an t-Eilean Sgitheanach agus tir-mòr, ach sguir iad sin ann an 1988.

Tha FlySkye a' dèanamh dheth gun dèanadh e feum mhòr do dh'eaconomaidh agus coimhearsnachd an eilein nam faigheadh iad ceangal adhair ri tir-mòr a-rithist.

Tha iad an dòchas tagradh a chuir gu Ùghdarras Catharra nan Seirbheisean Adhair a dh'aithghearr airson seirbheisean adhair a thòiseachadh às ùr.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile