Mèirle le gunna an Inbhir Nis ga rannsachadh

  • 31 Am Màrt 2014
Càr poilis ann an Inbhir Nis Image copyright Northpix
Image caption Nochd an duine ann am bùth Paddy Power ann an sgìre Queensgate timcheall air 09.30m Didòmhnaich.

Tha na poilis ann an Inbhir Nis a' rannsachadh mèirle le gunna a chaidh a dhèanamh aig bùth gheall sa bhaile.

Nochd an duine ann am bùth Paddy Power ann an sgìre Queensgate timcheall air 09.30m Didòmhnaich.

Thathas a' tuigsinn gun robh gunna-làimhe aige agus e a' bagairt air luchd-obrach.

Thèich e le na mìltean notaichean.

Chaidh am mèirleach fhaicinn às dèidh làimh a' dol tarsainn Sràid na h-Eaglaise agus Drochaid Sràid Greig, mus deach e fo Dhrochaid Friars.

Aodach

Thuirt na poilis gun robh an duine geal agus mu shia troighean de dh'àirde.

Dh'atharraich e aodach dà thuras às dèidh a' bhùth fhàgail.

An toiseach, bha seacaid bhombair dhubha air, le geansaidh soilleir-ghorm, balaclava dubh, briogais chargu dhubh agus brògan dubha.

Stad e greiseag airson geansaidh dearg is dubh agus ad dhubh a chur air, agus às dèidh greis eile chuir e air lèine-t dhorcha agus seann jeans dhubh.

Bha poca mòr dubh aige na làimh.

Thuirt na poilis nach deach duine a ghoirteachadh, agus tha iad ag iarraidh air duine sam bith le fiosrachadh brath a chur thuca.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile