Stiùidio
Cha chluich seo air an uidheamachd agaibh

Naidheachdan 11:00m

12 Am Màrt 2014 Ùraichte aig Ùraichte aig

Mailèisia

Thuirt an t-Arm ann am Mailèisia gur dòcha gu bheil sgeulachd a-niste air plèana a chaidh às an t-sealladh Dihaoine seo chaidh. Thuirt iad gun deach an siognal seo a thogail ann an Caolas a Tuath Malacca, ceudan mhìltean air falbh bhon àite mu dheireadh anns a bheil dearbhadh aca air an itealan. Tha iad cuideachd a' rannsachadh aithris gun deach rud fhaicinn a' losgadh anns an iarmailt an iar air Bhietnam mun àm a chaidh an t-itealan a dhìth. Chaidh Ministear Còmhdhail Mhailèisia às àicheadh gu bheil an rannsachadh air a dhol trullainn orra.

Fiachan

Chaidh an tomhas eadar cosgais gus cìsean an Alba nas doimhne ann am fiachan a rèir fhigearan ùra bho Riaghaltas na h-Alba an-diugh. Bha beàrn de £12m ann an-uiridh aig 8.3% de theachd-a-steach na h-Alba gu lèir. 'S e 7.3% àireamh na Rìoghachd Aonaichte air fad.

An t-Aonach Eòrpach

Thuirt Ed Miliband nach biodh dad de dhùil aig riaghaltas Làbarach referendum a chumail air ballrachd Bhreatainn anns an Aonadh Eòrpach an dèidh taghaidh choitchinn na h-ath-bhliadhna. Thuirt e nach fhaigheadh muinntir na Rìoghachd Aonaichte bhòt air a' chùis ach nam biodh gluasad ann airson tuilleadh de chumhachdan Bhreatainn a thoirt dhan Bhruiseil.

Iasadan Gnothachais

Thuirt Comataidh na h-Eaconamaidh ann am Pàrlamaid na h-Alba nach eil taghadh gu leòr idir aig gnìomhachasan beaga agus meadhanach a thaobh cò às a gheibh iad iasad. Ann an 2012 's ann bho Bhanca Rìoghail na h-Alba agus bho Bhanca na h-Alba a thàinig 30% de dh'iasadan gnothachais ann an Alba. Thuirt a' Chomataidh nach eil roghainn gu leòr ann, agus gum biodh taghadh nas fharsainne gu math nas fheàrr dhan eaconamaidh.

An Ugràin

Tha Prìomhaire eadar-amail na h-Ugràin, Arseniy Yatsenyuk, ann an Washington airson chòmhraidhean ris a' Cheann-suidhe Obama. Tha na Stàitean Aonaichte agus an t-Aonadh Eòrpach cuideachd a' beachdachadh an-dràsta air tuilleadh chasg-bhannan air an Ruis. Thuirt an Taigh Geal gum bi cùisean nas doirbhe buileach ma ghabhas referendum ann an Crimea air an deireadh-sheachdain ri uachdaranas na Ruis.

Co-op an Tairbeirt

Iarraidh Urras Cheann a Tuath na Hearadh beachd an t-sluaigh mus dèan iad an còrr còmhraidh ris a' Cho-op mu bhùth fhosgladh air an Tairbeart. Thèid ceisteachain a-mach anns a' phost a dh'aithghearr agus dragh air cuid san sgìre mun bhuaidh a bheireadh bùth ùr air a leithid a th' ann mar thà.

Cìs a' Chonnaidh

Tha Fair Fuel UK ag iarraidh air an t-Seansalar, Seòras Osborne, 3sg a ghearradh far Chìs a' Chonnaidh sa bhuidseat an ath-sheachdain. Tha a' bhuidheann iomairt ag ràdh gur ann a chuireadh cìs chonnaidh nas lugha ri ath-bheothachadh na h-eaconamaidh.