Àireamh sluaigh Thiriodh ga deasbad

  • 29 Am Faoilleach 2014
Talla Chrosaboil Image copyright Oliver Dixon / Geograph
Image caption Bidh a' bhùth-obrach Disathairne ann an Talla Chrosaboil.

Beachdaichidh na Tirisdich aig bùth-obrach deireadh na seachdain seo air mar a ghabhas àrdachadh a thoirt air àireamh sluaigh an eilein.

Sheall figearan a' chunntais-shluaigh an-uiridh gun do thuit àireamh sluaigh Thiriodh 15% eadar 2001 is 2011, gu 653.

Thuit àireamh-sluaigh Earra-Ghàidheal is Bhòid gu lèir còrr is 3,000 aig an aon àm.

'S e sin a tha a' fàgail gu bheil Com-pàirteachas Planadh Coimhearsnachd Earra-Ghàidheal is Bhòid a-nise a' dol air feadh na sgìre gus beachdan dhaoine a shireadh mun ghnothach.

'S e Urras Thiriodh a bhios os cionn ghnothaichean aig a' bhùth-obrach san eilean.

Am measg eile, tha dùil gun tèid beachdachadh air dòighean gus cosnadh a chruthachadh.

Teaghlaichean

"Tha sinn a' faicinn a h-uile bliadhna gu bheil teaghlaichean a' fàgail an eilein," thuirt Donna NicIlleathain bhon Urras.

"Chan fhaod sinn obraichean a thoirt a-mach às na speuran, chan eil fiosam cò às a tha an obair a' dol a thighinn," thuirt i.

Bha dòchas ann gum tigeadh obraichean gu Tiriodh à pròseict gus tuath-gaoithe a thogail far chosta an eilein.

Dh'innis Scottish Power Renewables san Dùbhlachd nach biodh an 'Argyll Array' a' dol air adhart.

Bidh bùth-obrach Thiriodh ann aig Talla Chrosaboil Disathairne eadar 1:30f is 5:00f

Bha bùithdean-obrach mar thà ann an Dùn Omhain is Baile Bhòid, is thèid beachdan a shireadh san Òban, Baile Eilidh, air an Tairbeart, agus Ceann Locha, a bharrachd air Tiriodh.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile