Stiùidio
Cha chluich seo air an uidheamachd agaibh

Naidheachdan 11:00m

22 Am Faoilleach 2014 Ùraichte aig Ùraichte aig

Cion-cosnaidh

Thuit àireamh a' chion-chosnaidh an Alba dhan ìre as lugha ann am faisg air còig bliadhna, sìos 25,000 gu 816,000 anns na trì mìosan eadar an t-Sultain agus an t-Samhain. Tha an àireamh air feadh na Rìoghachd Aonaichte air tuiteam gu 7.1% den t-sluagh - faisg air an ìre de 7% aig am beachdaich Banca Shasainn air an riadh a chur suas. Thuit an àireamh air feadh na Rìoghachd Aonaichte faisg air 170,000 gu beagan a bharrachd air 2,300,000.

Siria

Thuirt Ministear Cèin Shiria, aig toiseach nan còmhraidhean sìthe eadar-nàiseanta anns an Eilbheis, gu bheil feachdan nam buidhnean dùbhlannach a' dèanamh brùidealachd, agus thuirt e gu bheil dùthchannan eile a' dèanamh chùisean nas miosa buileach dhan t-sluagh. Thuirt Àrd-Rùnaire nan Dùthchannan Aonaichte, Ban Ki-moon, - a dh'fhosgail na còmhraidhean - gu bheil còmhradh doirbh agus dùbhlan romhpa.

Kiev

Chaidh aithris gun deach dithis a mharbhadh ann an sabaid eadar poilis gus luchd-iomairt ann an Kiev, prìomh bhaile Ugràin, far an deach laghan ùra an sàs mu bhith a' togail fianais. Thòisich an àimhreit anns an t-Samhain, nuair a ghabh an Riaghaltas ri ceanglaichean nas dlùithe ris an Ruis, seach aonta ùr ris an Aonadh Eòrpach.

Am Morair Rennard

Thuirt Ceannard nan Lib-Deamach, Nick Clegg, gun toir am pàrtaidh sùil às ùr air siostam peanas, an dèidh do chùis a' Mhorair Rennard. Tha am Morair Rennard a' beachdachadh air a dhol gu lagh, 's am pàrtaidh air a chasg rè ùine, an dèidh chasaidean gun do rinn e tàire dhrabasta air boireannaich a bha ag obair dhan phàrtaidh. Dhiùlt am Morair leisgeul a thabhainn, agus thuirt e nach do rinn e dad ceàrr. Dh'aidich Nick Clegg gun do rinn e fhèin agus am pàrtaidh droch làimhseachadh air a' chùis.

Buidseat na h-Alba

Tha Rùnaire Ionmhais na h-Alba, Iain Swinney, a' foillseachadh buidseat na bliadhna seo tighinn an-diugh. Tha e coltach gu bheil na Lib-Deamaich air taobhadh ris a' bhuidseat, ach gu bheil na Tòraidhean agus na Làbaraich teagmhach mu dheidhinn.

Poileasaidh Dealbhachaidh

Tha fear de chomhairlichean Inbhir Nis air Comhairle na Gàidhealtachd, am Ball neo-eisimeileach Jim Crawford, ag iarraidh làn-ath-sgrùdaidh air poileasaidh dealbhachaidh na Comhairle, agus àimhreit ann mu sgeama taigheadais ùr faisg air làrach Bhlàr Chùil Lodair air iomall a' bhaile. Ged a bhòt Comhairle na Gàidhealtachd na aghaidh, fhuair a' chompanaidh air cùlaibh na sgeama cead an dèidh dhaibh taradh ri Riaghaltas na h-Alba.