Stiùidio
Cha chluich seo air an uidheamachd agaibh

Naidheachdan 11:00m

31 An Dùbhlachd 2013 Ùraichte aig Ùraichte aig

Èirinn a Tuath

Dh'iarr am Prìomhaire, Daibhidh Camshron, air pàrtaidhean phoilitigeach Èirinn a Tuath cumail orra a' bruidhinn, a dh'aindeoin 's gun do dh'fhàillig còmhraidhean mu bhith a' faighinn thairis air cnap-starra ann an iomairt na sìthe. Choinnich riochdairean bho pàrtaidhean mòra na sgìre tron oidhche ann an oidhirp fuasgladh fhaighinn air cuspairean mar caismeachdan orainseach agus a bhith a' taisbeanadh bratach an aonaidh, ach dh'fhàilnich e orra rèite a ruighinn.

Suidheachadh èiginneach

Tha boireannach ann an suidheachadh èiginneach san ospadal às dèidh dhi a bhith air a' gaorradh le damh-fèidh ann an Loch Abar. Bha am boireannach à Cambridge air làithean-saora air a' Ghaidhealtachd le caraidean an uair a thug am beathach ionnsaigh oirre ann an Loch Ailleart tràth madainn an-dè. Tha e air a thuigsinn gun tàinig an damh a-mach às an dorchadas agus gun do dh'fheuch e oirre mun amhaich le a chabair. Dh'fhuiling am boireannach, a tha 30 bliadhna, droch lobhtan anns an ionnsaigh. Chaidh a toirt gu Ospadal a' Bhelford anns a' Ghearastan agus an uair sin gu ospadal ann an Glaschu.

Mìcheal Schumacher

Thuirt lighichean anns an Fhraing gu bheil Mìcheal Schumacher air beagan adhartais a dhèanamh às dèidh dhaibh obair-lannsa a dhèanamh air eanchainn airson an dàrna turas. Ann an coinneamh-naidheachd ann an Grenoble, thuirt dotairean gu bheil Schumacher, a rinn ainm dha fhèin ann a Formula 1, fhathast ann an cunnart a bheatha. Tha an Gearmailteach air a bhith ann an staid èiginneach anns an ospadal on a dh'fhuiling e droch sgailc mun cheann agus e a' sgitheadh air Là na Sàbaid.

Ionnsaigh dhrabasta

Rinn na Poilis oidhirp ùr airson lorg fhaighinn air fireannach a tha iad airson a cheasnachadh mu droch ionnsaigh dhrabasta ann an Siorrachd Obar Dheathain an-uiridh. Chaidh ionnsaigh a thoirt air boireannach, aois 33 bliadhna, ri taobh rathad an A90, faisg air Sròn na h-Aibhne, air oidhche na Bliadhn' Ùir. Tha an duine mu 50 bliadhna a dh'aois, 's bha e a' dràibheadh carbad le dath glas no airgead.

Maoim-slèibhe

Tha an sgìre mu thimcheall air na h-uimhir de thogalaichean flataichean ann an Dùn Dèagh fhathast dùinte do charbadan às dèidh maoim-slèibhe. Thuit balla air Sràid Gardener anns a' bhaile, agus chaidh na h-uimhir de dhaoine an cuir às an dachaighean gus an cumail sàbhailte. Cha deach duine a ghoirteachadh agus tha luchd-einnseanairidh air a bhith a' rannsachadh dè cho dona 's a tha am milleadh.